الەمدە كوروناۆيرۋس جۇقتىرعاندار سانى ميلليونعا جۋىقتادى

مادريد. قازاقپارات - يسپانيادا سوڭعى تاۋلىكتە كوروناۆيرۋس جۇقتىرعان 850 گە جۋىق ادام قايتىس بولدى.

ا ق ش- تا American Airlines كومپانياسى ۇكىمەتتەن 12 ميلليارد دولار سۇراپ وتىر. ال پولشادا قاتاڭ كارانتين رەجيمى ەنگىزىلدى، دەپ حابارلايدى قازاقپارات BBC اگەنتتىگىنە سىلتەمە جاساپ.

Covid-19 ۆيرۋسىن جۇقتىرۋشىلار سانى كۇن ساناپ ءوسىپ كەلەدى. سونىمەن قاتار ونىڭ تاراۋ جىلدامدىعى دا ارتتى.

دجون حوپكينس ۋنيۆەرسيتەتىنىڭ مالىمەتتەرى بويىنشا، الەم بويىنشا قاۋىپتى ۆيرۋستى جۇقتىرۋشىلار سانى سوڭعى ءۇش كۇن ىشىندە 128 مىڭ ادامعا جەتتى. اقپاننىڭ ورتاسىندا ۆيرۋس جۇقتىرۋشىلار سانى تاۋلىگىنە ورتاشا العاندا 2-3 مىڭ ادامدى قۇرادى.

ەگەر ۆيرۋستىڭ تاراۋى وسى قارقىنمەن جالعاسا بەرسە، وسى اپتانىڭ سوڭىندا-اق الەم بويىنشا كوروناۆيرۋس جۇقتىرعاندار 1 ميلليون ادامعا جەتەدى (سەيسەنبى كۇنى ولاردىڭ سانى 800 مىڭ بولعان).