الماتى وبلىسىندا اۋىل حالقى مەملەكەتتىك قىزمەتتى ونلاين الا باستادى

None
None
تالدىقورعان. قازاقپارات - الماتى وبلىسى حالقىنىڭ 70 پايىزى اۋىلدا تۇرادى. قازىرگى جاعدايعا بايلانىستى تۇرعىندار مەملەكەتتىك قىزمەتتەردى E- GOV پورتالى ارقىلى الۋدا، دەپ حابارلايدى قازاقپارات ءتىلشىسى.

ءبىر عانا كەربۇلاق اۋدانى تۇرعىندارىنىڭ 87 پايىزى ەلەكتروندى- سيفرلى قولتاڭبامەن قامتاماسىز ەتىلگەن.

«اۋدان بويىنشا كورسەتىلگەن 230 مىڭنان استام مەملەكەتتىك قىزمەتتىڭ 94 پايىزى ەلەكتروندى تۇردە جۇزەگە اسقان. ال وزىنە قىزمەت كورسەتۋ بۇرىشى ارقىلى 31 مىڭنان استام قىزمەت كورسەتىلگەن»، - دەيدى كەربۇلاق اۋدانى اكىمدىگىنىڭ اپپارات جەتەكشىسى اقنيەت تۇماتايەۆ.

اۋدانداعى بارلىق اۋىلدىق اكىمدىكتەر مەن مەكتەپتەردە وزىنە قىزمەت كورسەتۋ بۇرىشتارى قويىلعان. ۇيىندە كومپيۋتەرى جوق اۋىل تۇرعىنى قاجەتتى قۇجاتتاردى وزىنە قىزمەت كورسەتۋ بۇرىشىنان راسىمدەي الادى.

سارىوزەك اۋىلىندا تۇراتىن كوپبالالى انا الماگۇل بايبولاتوۆانىڭ اۋىل اكىمدىگىنە كەلىپ، مەملەكەتتىك قىزمەتتەردى ەلەكتروندى تۇردە الىپ جۇرگەنىنە جارتى جىلدان استى. اۋىل تۇرعىنىنىڭ ايتۋىنشا مەملەكەتتىك قىزمەتتەردى ەلەكتروندى تۇردە العاننىڭ ەشقانداي قيىندىعى جوق.

«ءبىر رەت كورىپ الساڭىز بولدى. ءوزىمنىڭ جەكە كىلتىم بار. سول كىلتىممەن كەز كەلگەن مەزگىلدە قاجەت قۇجاتتارىمدى ەشكىمنىڭ كومەگىنسىز الا بەرەم»، - دەيدى بەس بالانىڭ اناسى الماگۇل بايبولاتوۆا.

سوڭعى جاڭالىقتار