مەملەكەت باسشىسى قاسىم- جومارت توقايەۆ مالىمدەمەسىنىڭ تولىق ءماتىنى
مەملەكەت باسشىسى قاسىم- جومارت توقايەۆتىڭ مالىمدەمەسى
قۇرمەتتى وتانداستار! قازىر بۇكىل الەم بۇرىن- سوڭدى بولماعان كۇردەلى جاعدايمەن بەتپە- بەت كەلىپ وتىر. كوروناۆيرۋس ىندەتى دۇنيە ءجۇزىن جايلاپ بارادى. بۇگىندە 177 مەملەكەتتە 800 مىڭعا جۋىق ادام وسى دەرتكە شالدىقتى. ونى جۇقتىرعاندار سانى كۇننەن- كۇنگە ارتۋدا. ءبىز توتەنشە جاعداي جاريالاپ، قازاقستاندا ۆيرۋستىڭ جاپپاي تارالۋىنا جول بەرمەدىك. سونىڭ ارقاسىندا احۋالدى باقىلاۋدا ۇستاپ وتىرمىز. حالقى قازاقستانمەن شامالاس كەيبىر ەلدەردە كوروناۆيرۋسقا شالدىققاندار ونداعان ەسە كوپ. مەن ەلوردا مەن الماتىدا عانا ەمەس، ەلىمىزدىڭ بارلىق وڭىرىندە كارانتيندى كۇشەيتۋدى تاپسىردىم. بارشا قازاقستاندىقتارعا سابىر ساقتاپ، تۇسىنىستىك تانىتقانى ءۇشىن العىسىمدى ايتامىن. ءبىز دۇربەلەڭ تۋدىرۋعا جول بەرمەيمىز. ءدال وسى كەزدە حالىق مەملەكەتكە قولداۋ كورسەتۋى كەرەك. بۇل - اسا ماڭىزدى. كوروناۆيرۋس - باتپانداپ كىرىپ، مىسقالداپ شىعاتىن قاۋىپتى دەرت. دەگەنمەن، ءبىز ىندەتكە شالدىققان ادامدارعا بارلىق قاجەتتى كومەكتى كورسەتەمىز. بۇگىندە بۇكىل ەلىمىز دارىگەرلەر مەن مەديتسينا قىزمەتكەرلەرىنىڭ قايسارلىعىنا ءتانتى بولۋدا. ولار - ادام ومىرىنە اراشا ءتۇسىپ جاتقان بۇگىنگى كۇننىڭ باتىرلارى. سوندىقتان، پاندەمياعا قارسى كۇرەستىڭ الدىڭعى لەگىندە جۇرگەندەرگە قوسىمشا قولداۋ كورسەتۋ جونىندە شەشىم قابىلدادىم. دارىگەرلەرگە جانە مەديتسينا قىزمەتكەرلەرىنە 3 اي بويى قوسىمشا ۇستەمە اقى تولەنەدى. مەديتسينا قىزمەتكەرلەرىنىڭ ءومىرىن ساقتاندىرۋ ماسەلەسى دە شەشىمىن تاپتى. ارينە، اق حالاتتى ابزال جاندار بۇدان دا زور قولداۋعا لايىق.
توتەنشە جاعداي رەجيمىنىڭ قاشاندا ەكونوميكالىق جانە الەۋمەتتىك سالدارى بولادى. ءبىز ءۇشىن ازاماتتاردىڭ دەنساۋلىعىمەن قاتار ولاردىڭ ءوز تابىسىنان ايىرىلماۋى دا ماڭىزدى. مەن بۇعان دەيىن داعدارىسقا قارسى العاشقى شارالار توپتاماسىن جاريالادىم. جاعدايدىڭ ۋشىعا تۇسكەنىن ەسكەرىپ، ازاماتتارعا جانە بيزنەسكە ودان ءارى قولداۋ كورسەتۋ جونىندە مىناداي قوسىمشا شەشىمدەر قابىلدادىم. ينفلياتسيانىڭ ارتۋىنا بايلانىستى زەينەتاقى، مەملەكەتتىك جاردەماقى جانە اتاۋلى الەۋمەتتىك كومەك مولشەرىن 10 پايىزعا يندەكساتسيالاۋدى تاپسىردىم. وسىعان وراي، اتالعان ساناتتاعى ازاماتتاردىڭ تابىسىن ارتتىرۋ ءۇشىن مەملەكەت تاراپىنان 200 ميلليارد تەڭگەدەن استام قاراجات بولىنەدى. تابىسىنان ايىرىلعان ازاماتتارعا ەڭ تومەنگى جالاقى مولشەرىندە قولداۋ كورسەتتىك. ەندى، 42500 تەڭگە كولەمىندەگى وسى كومەكتى الاتىن ازاماتتاردىڭ ساناتىن كەڭەيتۋدى تاپسىرامىن. سوعان وراي، بۇل قولداۋعا ءوزىن- ءوزى جۇمىسپەن قامتىعاندار مەن رەسمي تىركەلمەي جۇمىس ىستەيتىندەر دە يە بولادى. بۇل كومەك بەلگىلەنگەن ءتارتىپ بويىنشا شىن مانىندە مۇقتاج ادامدارعا عانا بەرىلەدى. جالپى، 3 ميلليونعا جۋىق ازاماتىمىزعا قولداۋ كورسەتىلەدى. سونىمەن قاتار، تۇرمىسقا قاجەتتى زاتتار مەن ازىق- تۇلىكتى تەگىن الاتىن ازاماتتاردىڭ قاتارى كوبەيەدى. اتاپ ايتقاندا، مۇنداي كومەكتى مۇگەدەكتەر جانە جۇمىسسىز رەتىندە تىركەلگەن ازاماتتار دا يەلەنەدى. تەگىن ازىق- تۇلىك سەگىز ءجۇز مىڭنان استام ادامعا بەرىلەدى. مىندەتتى الەۋمەتتىك مەديتسينالىق ساقتاندىرۋ جۇيەسى بويىنشا ساقتاندىرىلماعان ازاماتتاردىڭ مەديتسينالىق كومەك الۋ قۇقىعىن 1 - ساۋىردەن 1 - شىلدەگە دەيىن ۇزارتۋدى تاپسىرامىن. سوعان بايلانىستى مەديتسينالىق كومەك ازاماتتارعا بۇرىنعىداي قول جەتىمدى بولىپ قالا بەرەدى.
ءبىز شاعىن جانە ورتا بيزنەسكە قولداۋ كورسەتۋ ءۇشىن بۇرىن- سوڭدى بولماعان شارالاردى قولعا الىپ وتىرمىز. كاسىپكەرلەرگە كومەك كورسەتۋىمىز كەرەك. ويتكەنى، ولار - ەكونوميكامىزدىڭ تىرەگى. اكىمدىكتەر جەرگىلىكتى كاسىپورىنداردىڭ ءونىمىن كەم دەگەندە 6 اي بويى كەپىلدى ساتىپ الۋ ءتارتىبىن جولعا قويۋى كەرەك. شاعىن جانە ورتا بيزنەس وكىلدەرىن بيىلعى 1 - قازانعا دەيىن ەڭبەكاقى تولەۋ قورىنان ۇستالاتىن سالىقتان بوساتۋدى تاپسىرامىن. مۇنداي قولداۋ ساۋدا، كولىك قىزمەتى، قوناقۇي، تۋريزم جانە باسقا دا سالالاردى قامتيدى. اۋىل شارۋاشىلىعىمەن اينالىساتىن كاسىپكەرلەرگە دە قولداۋ كورسەتىلەدى. اتاپ ايتقاندا، بيۋدجەتتەن 70 ميلليارد تەڭگە بولىنەدى.
كوكتەمگى ەگىس ناۋقانى ءۇشىن «قاراپايىم زاتتار ەكونوميكاسى» باعدارلاماسى ارقىلى قوسىمشا 100 ميلليارد تەڭگە ءبولۋدى تاپسىرامىن. ەڭ الدىمەن، شاعىن جانە ورتا شارۋا قوجالىقتارىنا قولداۋ كورسەتكەن ءجون. سونىمەن قاتار، ۇكىمەتكە جانارمايدىڭ نارىقتىق باعاسىن ون بەس پايىزعا ارزانداتىپ، 165 تەڭگەگە دەيىن تومەندەتۋ مىندەتى جۇكتەلدى. وسىنى قامتاماسىز ەتۋ ءۇشىن 390 مىڭ توننا جانارماي جەڭىلدىكپەن ساتىلاتىن بولادى. جالپى، وسى ايتىلعان شارالار قازىرگىدەي كۇردەلى كەزەڭدە ازاماتتار مەن وتاندىق بيزنەستى قولداۋ ءۇشىن كەرەك. مۇنىڭ بارلىعى كوروناۆيرۋس ىندەتىنىڭ زالالىن تەزىرەك جويۋعا اسەر ەتەدى دەپ سەنەمىن!
قۇرمەتتى وتانداستار! كوروناۆيرۋس ىندەتىنە بايلانىستى بارشامىز كۇردەلى كەزەڭدى وتكەرىپ وتىرمىز. ءبىراق، بۇل - ۋاقىتشا قيىندىق. ءبىز ونى مىندەتتى تۇردە جەڭەمىز!
بۇكىل الەم كۇرەسۋدە. ءبىز دە بار كۇش- جىگەرىمىزدى سالامىز. ءبىز، مەملەكەت جانە قوعام بولىپ بارشا ازاماتتارىمىزعا قولداۋ كورسەتەمىز، ەشكىمدى كومەكسىز قالدىرمايمىز. مۇقتاج ادامدارعا قول ۇشىن بەرەمىز. بۇعان ەشقانداي كۇمان بولماۋى كەرەك. ەڭ باستىسى، شىدامدىلىق، توزىمدىلىك جانە جاۋاپكەرشىلىك تانىتايىق. ءبىز - رۋحى اسقاق، بىرلىگى بەكەم، ەڭسەسى بيىك حالىقپىز. سوندىقتان، بۇل سىناقتان دا سۇرىنبەي ءوتىپ، قيىندىقتى بىرگە ەڭسەرەمىز دەپ سەنەمىن. باستى تويلارىمىز ءالى الدا.
ءتورت قۇبىلامىز تۇگەل بولسىن، اعايىن! ءبىز بىرگەمىز!