12:30, 31 - ناۋرىز 2020 | GMT +6
يتاليادا كوروناۆيرۋس كورسەتكىشى تومەندەي باستادى
نۇر-سۇلتان. قازاقپارات - يتاليادا كوروناۆيرۋس جۇقتىرعانداردىڭ سانى 100 مىڭنان استى، ءبىر تۇندە 892 ادام قايتىس بولدى.
الايدا ەلدىڭ ازاماتتىق قورعانىس قىزمەتىنىڭ باسشىسى اندجەلو بورەلليدىڭ ايتۋىنشا، ەلدە ۆيرۋستى جۇقتىرۋ بويىنشا رەكوردتىق تومەن كورسەتكىش تىركەلگەن، - دەپ حابارلايدى ريا نوۆوستي.
«بۇگىندە 75528 يتاليالىق ۆيرۋس جۇقتىرعان، ءبىر تاۋلىكتە 1648 ادام كوروناۆيرۋس ىندەتىن جۇقتىرعان»، - دەدى بورەللي.
سوڭعى 13 كۇندە ۆيرۋس جۇقتىرعانداردىڭ سانى تاۋلىگىنە 3 مىڭنان تۇسپەگەن. ناۋقاستاردىڭ كوروناۆيرۋستى جۇقتىرۋ بويىنشا تومەن كورسەتكىشى 10-ناۋرىزدان بەرى تىركەلمەگەن.
«1590 ادام جازىلىپ شىقتى. ال جالپى - 14620 ناۋقاس ۆيرۋستان ەمدەلىپ شىقتى. بۇل - ەپيدەميا باستالعاننان بەرى رەكوردتىق كورسەتكىش»، - دەپ مالىمدەدى بورەللي.