شىمكەنت دارىگەرلەرى قولىنىڭ سۇيەگى ۇگىتىلىپ كەتكەن جىگىتكە كۇردەلى وتا جاسادى
قولىنىڭ سۇيەگى ۇگىتىلىپ كەتكەن ناۋقاسقا دارىگەرلەر كۇردەلى وتا جاسادى، دەپ حابارلايدى قازاقپارات ءتىلشىسى.
قالالىق دەنساۋلىق ساقتاۋ باسقارماسىنىڭ مالىمەتىنشە، وڭ قولىنىڭ سۇيەكتەرى مايدالانىپ كەتكەن ناۋقاستى اۋىر حالدە جەدەل جاردەم قىزمەتى اۋرۋحاناعا جەتكىزگەن.
مەديتسينا ماماندارى جاس جىگىتتىڭ ءومىرىن امان الىپ قالۋ ءۇشىن شۇعىل تۇردە وتا جاساپ، قولىنىڭ مايدالانعان سۇيەكتەرىن جيناپ بەرگەن.
ءبىرىنشى كەزەڭدەگى وپەراتسيادا حيرۋرگتار جىگىتتىڭ قولىنداعى تامىرلارىن تىگىپ، سۇيەكتەرىن قايتا قالپىنا كەلتىرگەن. اراعا ءبىر اي سالىپ، گيپەرباريالىق وكسيگەناتسيا ورتالىعىنىڭ حيرۋرگى مۇحيت دوسىبايەۆتىڭ جەتەكشىلىگىمەن ناۋقاسقا ەكىنشى كەزەڭدى كۇردەلى وتا جاسالعان.
ناقتىراق ايتقاندا، دەنەنىڭ باسقا جەرىنەن تەرى الىنىپ، قولىنا جاپسىرۋعا تۋرا كەلگەن. دارىگەردىڭ ايتۋىنشا، تەرى ءجۇز پايىز جابىسقان.
دارىگەرلەر ناۋقاستىڭ قازىرگى جاعدايىن قاناعاتتانارلىق دەپ باعالاۋدا. جاس جىگىت بۇگىندە وڭ قولىن قالپىنا كەلتىرگەن دارىگەرگە ريزاشىلىعىن بىلدىرۋدە.