كوروناۆيرۋس جۇقتىرعان ادام ەكى اپتا بويى ەمدەلەدى - ەلجان ءبىرتانوۆ

None
None
نۇر-سۇلتان. قازاقپارات - ينفەكتسيانىڭ تارالۋىن توقتاتۋ ماقساتىندا وبلىستىق دەڭگەيدە، قالالىق دەڭگەيدە كارانتين جاريالانۋى مۇمكىن.

بۇل تۋرالى ەلدەگى كوروناۆيرۋس جاعدايى جايلى ونلاين بريفينگتە ايتىلدى، دەپ حابارلايدى قازاقپارات ءتىلشىسى.

«كارانتين جاعدايىندا تەك شەتەلدىك ازاماتتار عانا سىرتقا شىعا الادى جانە ءوزىمىزدىڭ ەلدىڭ ازاماتتارى عانا ەلگە كىرە الادى. شەتەل ازاماتتارى ەلگە كىرە المايدى. ءار ءوڭىردىڭ ەپيدەميولوگيالىق جاعدايىنا بايلانىستى اكىمدەر شەشىم قابىلدايدى. قازىرگى زاڭناما بويىنشا، بۇل شەشىمدى وبلىستىڭ نە اۋداننىڭ باس سانيتار دارىگەرى جاريالايدى. مىسالى، الماتى قالاسىنداعى باس سانيتار دارىگەر ءوزىنىڭ قاۋلىسىمەن قاجەتتى كارانتيندىك شارالار ەنگىزۋ بويىنشا شەشىم قابىلدايدى جانە ونى اكىمشىلىك، باسقا دا مەملەكەتتىك ورگاندار، ۇيىمدار مىندەتتى تۇردە ورىنداۋى ءتيىس»، - دەيدى ق ر دەنساۋلىق ساقتاۋ ءمينيسترى ەلجان ءبىرتانوۆ.

ونىڭ ايتۋىنشا، كەشەدەن باستاپ اتىراۋ وبلىسىندا، قاراعاندى قالاسىندا، اقتوبە وبلىسىندا باس سانيتار دارىگەرلەر شەشىم قابىلداعان.

«كارانتيندىك شارالاردىڭ نەگىزگى ماقساتى - ينفەكتسيانىڭ تارالۋىن جويۋ. بۇل ينفەكتسيا ەل اراسىندا الەۋمەتتىك قارىم-قاتىناس نەگىزىندە تارايدى. ءبىز تۋىستارمەن، باسقا دا ادامدارمەن جۇمىس بويىنشا، ءارتۇرلى سەبەپتەر بويىنشا ارالاسامىز. سونى تەزىرەك توقتاتساق، ينفەكتسيا دا توقتايدى. كوبىنەسە بۇل اۋرۋدان ەكى اپتا ىشىندە ەمدەلىپ شىعىپ جاتىر. وسى جاعدايدا ەمدەلەتىن دەڭگەيىمىز اۋىراتىن دەڭگەيدەن وزادى. سول سەبەپتى دە وبلىستىق دەڭگەيدە، قالالىق دەڭگەيدە كارانتين بولۋى مۇمكىن. قالا ىشىندە تۇرعىن ءۇي، اۋرۋحانا، جاتاقحانادا كارانتين ەنگىزۋىمىز مۇمكىن، ويتكەنى ينفەكتسيا تابىلىپ، كوپ ادام اۋىرسا - ولار سول جەردەن شىقپاي، ەمدەلۋى ءتيىس»، - دەيدى ول.


سوڭعى جاڭالىقتار