داكەدەن ماسكا تىگۋ ۇيات ەمەس، ماسكا تاپشىلىعى بۇكىل الەمدە بار - مينيستر
«جىل باسىندا ەلىمىزدە كۇندەلىكتى 200 مىڭ ماسكا تىگىپ، ءوزىمىز پايدالاناتىنبىز. ماسكانىڭ %80 ءوز ەلىمىزدە تىگىلەدى. ال ارنايى ماسكانى شەتەلدەن الامىز. ەپيدەميانىڭ الدىندا ءبىزدىڭ مەملەكەتتەگى فارماتسيەۆتيكالىق زاۋىتتار كۇندەلىكتى 200 مىڭ، ايىنا 6 ميلليون دانا ماسكا شىعاراتىن جانە ول جەتكىلىكتى بولاتىن»، - دەيدى ق ر دەنساۋلىق ساقتاۋ ءمينيسترى ەلجان ءبىرتانوۆ.
ول اقپان ايىندا ەپيدەميا باستالعالى اتالعان زاۋىتتاردىڭ مۇمكىندىگىن كەڭەيتۋ جۇمىستارى جۇرگىزىلگەنىن ايتتى.
«وكىنىشكە قاراي، ول وڭاي بولعان جوق. شيكىزاتتىڭ كوبى قىتايدان الدىرىلاتىن، ال قىتاي ەكسپورتتى توقتاتتى. باسقا دا مەملەكەتتەردىڭ مۇمكىندىگىن، ءوزىمىزدىڭ ەلدەگى مۇمكىندىكتى قاراستىرىپ، كۇنىنە 1 ميلليون دانا ءتۇرلى ماسكا تىگىلۋدە. ءبىر ايدا ەلىمىزدە 30 ميلليون ماسكا تىگىلىپ، قاجەتتى مەديتسينالىق مەكەمە، ءدارىحانالارعا تاراتىلدى. شىنىن ايتۋ كەرەك، مەديتسينالىق ماسكا قاجەتتىلىگى ءالى بار. بىزگە 45 ميلليونعا جۋىق ماسكا كەرەك بولىپ تۇر، دەمەك ماسكا تاپشىلىعى بار. ماسكا تاپشىلىعىن جويۋ ءۇشىن مەملەكەت تاراپىنان ماسكا ەكسپورتتاۋ توقتاتىلدى. ەكىنشىدەن، ماسكا مەملەكەتتىك كوميسسيانىڭ شەشىمىمەن تاراتىلادى. الدىمەن مەديتسينالىق مەكەمەلەرگە تاراتىلادى. مەملەكەت باسشىسىنىڭ تاپسىرماسى بويىنشا، كەيبىر قاجەتتى توپتارعا تەگىن بەرىلەدى. بۇل جۇمىستار نۇر-سۇلتان، الماتى قالالارىندا باستالىپ كەتتى. ماسكاعا قاتىستى جاعداي دۇنيە جۇزىندە بار، سەبەبى بۇعان ەشكىم دايىن بولعان جوق. كەيبىر ادام داكەدەن ماسكا تىگۋ ۇيات ەكەنىن ايتادى. ول ۇيالاتىن جاعداي ەمەس، سەبەبى قازاقستاندا عانا ەمەس، باسقا دا مەملەكەتتەردە اسكەري، مەديتسينالىق قىزمەتكەرلەر، تۇرمەدە وتىرعان ازاماتتار، ارتىستەر ءبىزدى قولداپ، ماسكا تىگىپ جاتىر. وتكەن عاسىردا اتا-بابالارىمىز داكەدەن جاسالعان ماسكا ارقىلى بۇدان دا قاۋىپتى ەپيدەميالاردى توقتاتقان. دۇنيە جۇزىندە وسىنداي قيىن جاعداي بولعان كەزدە بارلىق مۇمكىندىكتەردى پايدالانۋىمىز كەرەك. قاجەت بولسا وسىنداي مارلىدەن كوپ رەت پايدالانۋعا بولاتىن ماسكا تىگىپ، پايدالانامىز. ماقسات - ينفەكتسيانى توقتاتۋ» , - دەيدى ول.