قازاقستان استىق پەن ۇن ەكسپورتىنا شەكتەۋ ەنگىزەدى

نۇر- سۇلتان. قازاقپارات – ق ر اۋىل شارۋاشىلىعى مينيسترلىگى ۇن ەكسپورتىنا سالىنعان تىيىمدى الىپ تاستاپ، استىقتى شەتكە شىعارۋعا شەكتەۋ ەنگىزەدى، دەپ حابارلايدى قازاقپارات ءتىلشىسى.

مينيسترلىكتىڭ باسپا ءسوز قىزمەتى حابارلاعانداي، ەلىمىزدىڭ استىققا دەگەن ىشكى قاجەتتىلىگىن قامتاماسىز ەتۋ ماقساتىندا (ونىڭ ىشىندە ازىق- تۇلىك كولەمىن ساقتاۋ جانە تاماق ونەركاسىبىن قايتا وڭدەۋ ءۇشىن) توتەنشە جاعداي كەزىندە بيداي ەكسپورتىنا شەكتەۋ ەنگىزىلمەك.

سونداي- اق، ق ر ا ش م ۇندى ەكسپورتتاۋ بويىنشا تىيىمدى الىپ تاستاپ، ونىڭ ورنىنا ۇندى رەسپۋبليكادان تىس جەرگە شىعارۋعا شەكتەۋ قويادى. «وسىعان وراي ەندى بيداي مەن ۇن ەكسپورتى ق ر اۋىل شارۋاشىلىعى مينيسترلىگى اي سايىنعى بەلگىلەگەن كۆوتا شەڭبەرىندە جۇزەگە اسىرىلادى. كۆوتالاردى ءبولۋ مەن ولاردىڭ كولەمى الداعى ۋاقىتتا مينيسترلىكتىڭ رەسمي ينتەرنەت رەسۋرسىندا جاريالانادى»، - دەپ حابارلايدى مينيسترلىكتەن.

سونداي- اق مينيسترلىك رەسپۋبليكادا قانشا استىق كولەمى بار ەكەنىن جاريالادى. «ق ر ۇلتتىق ەكونوميكا مينيسترلىگى ستاتيستيكا كوميتەتىنىڭ مالىمەتىنشە، 2020 -جىلدىڭ 1 - ناۋرىزىنداعى اقپاراتقا سايكەس قازاقستاندا 9,2 ميلليون توننا، ونىڭ ىشىندە ازىق- تۇلىك - 6,4 ميلليون توننا، تۇقىمدىق - 1,5 ميلليون توننا، جەمدىك - 1,3 ميلليون توننا استىق بار»، - دەپ حابارلايدى مينيسترلىكتىڭ باسپا ءسوز قىزمەتىنەن.

اۆتور: ايان بەكەن ۇلى