ادىلەت ءمينيسترى كۇشەيتىلگەن كارانتين رەجىمىندەگى جاڭا مىندەتتەرگە قاتىستى پىكىر ءبىلدىردى
«بۇگىننەن باستاپ ەلىمىزدىڭ بىرنەشە قالاسىندا كارانتين رەجىمى كۇشەيتىلدى. بارلىعىمىزعا ءبىزدىڭ كۇندەلىكتى ومىرىمىزگە اسەر ەتەتىن جاڭا مىندەتتەر جۇكتەلىپ وتىر. ءارقايسىمىز وسى جاڭا مىندەتتەردى تولىقتاي ورىنداساق، ولاردىڭ تيىمدىلىگى ارتادى. بۇلار قاجەتتى ءارى ۋاقىتشا شارالار. سوندىقتان ەل تۇرعىندارىن وسى مىندەتتەردى جاۋاپكەرشىلىكپەن ورىنداۋعا شاقىرامىز»، - دەدى م. بەكەتايەۆ حابار 24 تەلەارناسىندا وتكەن ونلاين بريفينگتە.
ونىڭ سوزىنە قاراعاندا، اكىمشىلىك ءارى قىلمىستىق سانكسيالار ءبىرىنشى كەزەكتە الدىن الۋ شارالارىنا ارنالعان.
«بۇل سانكسيالار ادامداردى زاڭدى بۇزباۋىنا ىنتالاندىرۋى ءتيىس. سالىناتىن ايىپپۇلدار بيۋدجەتتى تولىقتىرۋ ماقساتىن كوزدەمەيدى. وسى رەتتە سالىقتار بيۋدجەتتى قامتاماسىز ەتۋگە جەتكىلىكتى. اتاپ ايتقاندا، پوليتسەيلەر ءتارتىپ بۇزعانداردىڭ بارلىعىن قاماۋعا الۋ ماقساتىن قويىپ وتىرعان جوق. ولاردىڭ باستى ماقساتى - ەرەجە بۇزۋدىڭ الدىن الۋ، ءتۇسىندىرۋ شارالارىن جۇرگىزۋ. توتەنشە جاعداي كەزەڭىندەگى پوليتسەيلەردىڭ قيىن جۇمىسىنا كومەكتەسۋگە شاقىرامىز. ەگەر دە ءتيىستى ماقساتتا پاتەردەن شىعاتىن بولساڭىز، پوليتسيا قىزمەتكەرلەرىنە قايدا جانە قانداي ماقساتتا بارا جاتقانىڭىزدى تۇسىنىكتى ايتىڭىزدار. قالا ىشىندە جۇرەتىن باعداردى راستايتىن قۇجاتتارىڭىز بولسا، بۇل ءوز كەزەگىندە پوليتسەيلەردىڭ جۇمىسىن جەڭىلدەتەدى»، - دەپ ءتۇسىندىردى مينيستر.
بۇدان بۇرىن حابارلانعانداي، ەلوردا اكىمدىگى كۇشەيتىلگەن كارانتين رەجىمى كەزىندە جۇمىسقا باراتىن ازاماتتاردىڭ وزىمەن بىرگە قانداي قۇجات الىپ ءجۇرۋى كەرەك ەكەنىن ايتتى.
اۆتور: رۋسلان عابباسوۆ