توكيو وليمپياداسىنىڭ قاشان وتەتىنى بەلگىلى بولدى

None
None
نۇر- سۇلتان. قازاقپارات - توكيو وليمپياداسى كەلەسى جىلدىڭ 23 - شىلدەسى مەن 8 - تامىزى ارالىعىندا وتەدى، دەپ حابارلايدى قازاقپارات ءتىلشىسى ۇلتتىق وليمپيادا كوميتەتىنە سىلتەمە جاساپ.

وسىلايشا حالىقارالىق وليمپيادا كوميتەتى، حالىقارالىق پاراليمپيادا كوميتەتى، توكيو-2020 ويىندارىن ۇيىمداستىرۋ كوميتەتى، سونداي- اق، توكيو قالاسى مەن جاپونيا بيلىگى وليمپيادا ويىندارى وتەتىن جاڭا مەرزىمدى بەكىتتى.

بۇگىن تەلەفون ارقىلى وتكەن جيىنعا ح و ك پرەزيدەنتى توماس باح، توكيو-2020 پرەزيدەنتى موري يوشيرو، توكيو گۋبەرناتورى كويكە يۋريكو، وليمپيادا جانە پاراليمپيادا ويىندارىنىڭ ءمينيسترى حاسيميتو سەيكو قاتىستى. جاڭا شەشىمدى قابىلداۋ بارىسىندا تاراپتار 2020 -جىلدىڭ 17 - ناۋرىزىندا ح و ك اتقارۋشى كوميتەتى بەكىتكەن نەگىزگى ءۇش قاعيدانى ۇستاندى.

1. سپورتشىلار مەن بارلىق قاتىسۋشىلاردىڭ دەنساۋلىعىن ساقتاۋ، سونىمەن قاتار، COVID-19 ىندەتىنىڭ تەجەلۋىن قولداۋ؛

2. سپورتشىلار مەن وليمپيادالىق سپورت تۇرلەرىنىڭ ۇستانىمىن قورعاۋ؛

3. عالامداعى حالىقارالىق سپورت كۇنتىزبەسى. جيىن بارىسىندا جازعى سپورت تۇرلەرىندەگى بارلىق حالىقارالىق فەدەراتسيالار مەن ۇلتتىق وليمپيادا كوميتەتتەرى قابىلدانعان شەشىمدى قولدادى.

ايتا كەتەلىك، 24 - ناۋرىز كۇنى الەمدە COVID-19 ىندەتىنىڭ تارالۋىنا بايلانىستى جاپونيا بيلىگى مەن ح و ك بىرلەسە وتىرىپ، وليمپيادا ويىندارىن كەلەسى جىلعا قالدىرۋ تۋرالى شەشىم قابىلداعان ەدى.

وسىلايشا، جاڭادان بەكىتىلگەن مەرزىمگە سايكەس توكيو وليمپياداسى 2021 -جىلدىڭ 23 - شىلدەسى مەن 8 - تامىزى ارالىعىندا وتەدى. پاراليمپيادا ويىندارى 24 - تامىز بەن 5 - قىركۇيەك ارالىعىندا ۇيىمداستىرىلادى.

سوڭعى جاڭالىقتار