ەلورداعا ازىق- تۇلىك قاجەتتى كولەمدە جەتكىزىلۋدە - قالا اكىمدىگى

None
None
نۇر- سۇلتان. قازاقپارات - كارانتين كەزەڭىندە ەلورداعا ازىق- تۇلىك تۇراقتى جەتكىزىلىپ جاتىر. بۇل تۋرالى نۇر- سۇلتان قالاسى اكىمدىگى ساۋدا جانە قىزمەت كورسەتۋ سالاسىن دامىتۋ ءبولىمىنىڭ جەتەكشىسى رۋسلان ىدىرىسوۆ ءمالىم ەتتى، دەپ حابارلايدى قازاقپارات ءتىلشىسى.

ايتا كەتەيىك، كارانتين رەجىمىنىڭ كۇشەيتىلۋىنە بايلانىستى الەۋمەتتىك جەلىلەردە ەلورداداعى الەۋمەتتىك ماڭىزداعى ازىق- تۇلىك كولەمىنە قاتىستى ءتۇرلى پىكىرلەر تاراۋدا. «بۇگىندە ەلوردا بويىنشا ازىق- تۇلىك جەتكىزۋ تۇرعىسىندا ەشقانداي پروبلەما جوق. ونىمدەر كۇن سايىن تۇراقتى جەتكىزىلۋدە. ورتاشا العاندا، ايىنا قالاعا 77,4 مىڭ توننا ءونىم كەرەك. ونىڭ ىشىندە 19 الەۋمەتتىك ماڭىزداعى ءونىم بويىنشا 39 مىڭ توننا قامتىلادى. قالادا رەسمي تۇردە 80 ناۋبايحانا جۇمىس ىستەپ تۇر، ال جالپى ولاردىڭ سانى 150-180 ارالىعىندا. سوندىقتان نان كۇندەلىكتى دۇكەندەرگە جەتكىزىلۋدە»،- دەدى ر. ىدىرىسوۆ اگەنتتىك تىلشىسىنە. سونىمەن قاتار كوروناۆيرۋس ينفەكسياسىمەن كۇرەس بويىنشا شتاب قۇرىلعانىن، ونىڭ قۇرامىندا قالادا ازىق- تۇلىكتى جەتكىزۋگە جاۋاپتى توپتار بار ەكەنىن ەسكە سالدى.

«مونيتورينگ بارىسىندا نارىققا ازىق- تۇلىك جەتكىزۋدە ەشقانداي كەدەرگىلەر جوق. قالا تۇرعىندارى قاجەتتى ونىممەن تولىقتاي قامتاماسىز ەتىلگەن»، - دەدى ول. وسى ورايدا ەت ونىمدەرى دە كۇن سايىن جەتكىزىلىپ جاتىر. سونىمەن قاتار، اقمولا جانە قاراعاندى وبلىستارىنان كۇندەلىكتى ءسۇت ونىمدەرى تاسىمالدانۋدا. ر. ىدىرىسوۆتىڭ ايتۋىنشا، كاسىپورىنداردىڭ كوبىسى ءونىمدى بۇرىنعى دەڭگەيدە ءوندىرىپ جاتىر.

«اتاپ ايتقاندا، بۇل باعىتتا ەشقانداي كەدەرگىلەر بايقالمادى، سايكەسىنشە، الاڭداۋدىڭ رەتى جوق. شتاب تاۋلىك بويى جۇمىس ىستەپ جاتىر. اتالعان توپتار ازىق- تۇلىكپەن قالاعا كىرگەن كولىكتەرگە تۇراقتى مونيتورينگ جۇرگىزۋدە» ، - دەدى ول. بۇدان بۇرىن حابارلانعانداي، ناۋرىز ايىنىڭ ورتا كەزىندە اۋىل شارۋاشىلىعى ءمينيسترى ساپارحان وماروۆ قويمالارداعى ازىق- تۇلىك قورى تۋرالى ايتىپ بەردى.

سوڭعى جاڭالىقتار