ونەركاسىپتىك ساياساتتى تۇبەگەيلى قايتا قاراۋ قاجەت - داريعا نازاربايەۆا
سەنات ءتوراعاسى ول تۋرالى «ەگەمەن قازاقستان» گازەتىندە جاريالانعان ماقالاسىندا اتاپ كورسەتتى، دەپ حابارلايدى قازاقپارات سەناتتىڭ باسپا ءسوز قىزمەتىنە سىلتەمە جاساپ.
جوعارعى پالاتادا ناۋرىز ايىنىڭ باسىندا «قازاقستاننىڭ جەڭىل ونەركاسىبى: قازىرگى جاي- كۇيى جانە ونىمدىلىگى جوعارى بيزنەستىڭ دامۋ بولاشاعى» اتتى پارلامەنتتىك تىڭداۋ وتكەن بولاتىن. داريعا نازاربايەۆا دەپۋتاتتار سالا وكىلدەرىمەن بىرلەسە وتىرىپ، نەگىزگى پروبلەمالىق ماسەلەلەردى انىقتاۋدا اۋقىمدى جۇمىستار اتقارعانىن جانە قازاقستاننىڭ جەڭىل ونەركاسىبىن دامىتۋ جونىندە ءبىرقاتار ۇسىنىستار ازىرلەگەنىن اتاپ ءوتتى. دەگەنمەن، بارلىق ەلدەرگە دەمدە تاراعان قاۋىپتى دەرت ەل ەكونوميكاسىنداعى سالالاردىڭ ءرولىن قايتا قاراۋعا ءماجبۇر ەتەدى.
«كوروناۆيرۋس پاندەمياسىنىڭ سالدارى الەمدىك جانە وتاندىق ەكونوميكاعا دا اۋىر ءتيۋى مۇمكىن. بۇل جاقسى ەمەس. سالالارداعى ۇيرەنشىكتى بايلانىستار بۇزىلدى»،- دەدى پالاتا باسشىسى. سەنات ءتوراعاسى داعدارىس جاعدايىندا ەل قاۋىپسىزدىگىنە قاتىستى نەگىزگى ماسەلەلەردى كوتەرە وتىرىپ، ەكونوميكانىڭ بارلىق سەكتورلارىندا جۇمىلدىرۋ رەزەرۆتەرىنىڭ بولۋى قاجەتتىگىن اتاپ ءوتتى.
«نارىققا ءبارىن بەرە سالۋعا بولمايدى. ونەركاسىپتىك ساياساتتى تۇبەگەيلى قايتا قاراۋ قاجەت. كۇتپەگەن جاعدايلارعا جاۋاپ بەرۋ ءۇشىن جۇمىلدىرۋ قۋاتى مەن مەملەكەتتىك رەزەرۆتى قالپىنا كەلتىرۋ - ومىرلىك ماڭىزى بار ماسەلەلەر»، - دەدى ول. داريعا نازاربايەۆا سونىمەن قاتار، ايماقتار دا ءوز ەرەكشەلىكتەرىنە قاراي شۇعىل جاعدايلارعا جاۋاپ قايتارۋدىڭ ارنايى تەتىكتەرىن قاراستىرۋى ءتيىس ەكەنىنە ەرەكشە نازار اۋداردى.
سەنات باسشىسى ەل ەكونوميكاسىنداعى داعدارىستى جاعدايلار تۋرالى ايتا كەلىپ: « ءبىزدىڭ ەكونوميكامىز يكەمدى بولماي شىقتى. سوڭعى ۋاقىتتا پاندەميا مەن مۇنايعا بايلانىستى ەنەرگيا قورىنا سۇرانىستىڭ تومەندەۋى قازاقستان ەكونوميكاسى ءۇشىن بۇرىن- سوڭدى بولماعان سىن- قاتەرلەر تۋدىردى. ەندى بارلىق ينستيتۋتتىڭ بەرىكتىگى سىنالادى»، دەدى. د. نازاربايەۆانىڭ ايتۋىنشا، بار رەسۋرستاردى مۇمكىندىگىنشە وڭدەۋ ونەركاسىبىن دامىتۋعا جۇمساۋ كەرەك، بۇل البەتتە جەڭىل ونەركاسىپكە قاتىستى بولىپ وتىر. «بارىنەن بۇرىن ەلدىڭ ازىق- تۇلىك قاۋىپسىزدىگىن قامتاماسىز ەتەتىن اۋىل شارۋاشىلىعىنا قاتىستى. قيىن كەزەڭ كەلدى. ءبىز كوپ نارسەدەن باس تارتا الامىز. ءبىراق تاماق، كيىم، اياق كيىم ءارقاشان جەتكىلىكتى بولۋى ءتيىس»،- دەدى پالاتا ءتوراعاسى. د. نازاربايەۆا سونىمەن قاتار ەلىمىزدىڭ ەكونوميكاسىنداعى اگروونەركاسىپ سەكتورىنىڭ رولىنە ەرەكشە توقتالا كەلىپ: «اگروونەركاسىپ كەشەنى ەلىمىزدىڭ ازىق- تۇلىك تاۋەلسىزدىگىن قامتاماسىز ەتەتىن جانە حالىقتىڭ كۇندەلىكتى تۇتىنۋ تاۋارلارىنا دەگەن نەگىزگى قاجەتتىلىكتەرىن قاناعاتتاندىراتىن ەكونوميكا سالالارى ءۇشىن تاۋەلسىز شيكىزات كوزى بولۋى ءتيىس»، - دەدى.
سەنات ءتوراعاسى ماقالانى قورىتىندىلاي كەلىپ، ستراتەگيالىق سيپاتتاعى قۇجاتتاردى قايتا قاراۋ قاجەتتىگىن اتاپ كورسەتتى. «بارلىق دامۋ باعدارلاماسىنا ورىن الۋى مۇمكىن داعدارىستارعا بايلانىستى تۇزەتۋلەر ەنگىزۋگە ءتيىسپىز. بۇل - پاندەميا، كليماتتىڭ وزگەرۋى، دۇشپاندىق ارەكەتتەر، شيكىزات نەمەسە قارجى نارىقتارىنداعى قۇرىلىمدىق قۇلدىراۋلار جانە ەلىمىز ءۇشىن قالامايتىن باسقا دا جاعدايلار بولۋى مۇمكىن. الايدا ءبىز بارلىعىنا دايىن بولۋىمىز كەرەك» ، - دەدى د. نازاربايەۆا.