كوروناۆيرۋسپەن كۇرەس: دارىگەرلەر ايىنا ميلليون تەڭگە الادى

نۇر- سۇلتان. قازاقپارات - كوروناۆيرۋس ىندەتىمەن كۇرەسىپ جاتقان دارىگەرلەرگە ءۇش سانات بويىنشا جالاقىسىنا ۇستەمەاقى قوسىلادى.

بۇل تۋرالى «حابار 24» تەلەارناسىنىڭ تىكەلەي ەفيرىنەن ق ر اقپارات جانە قوعامدىق دامۋ ءمينيسترى داۋرەن ابايەۆ ايتتى، دەپ حابارلايدى قازاقپارات ءتىلشىسى.

«مەملەكەت باسشىسى قاسىم- جومارت توقايەۆ كوروناۆيرۋسپەن كۇرەسىپ جاتقان مەديتسينا قىزمەتكەرلەرىنە كومەك كورسەتۋ تۋرالى تاپسىرما بەرگەن. وسىعان وراي بۇگىن ۇكىمەت باسشىسى اسقار مامين مەملەكەتتىك كوميسسيانىڭ وتىرىسىن وتكىزىپ، وندا ارنايى شەشىم قابىلدادى» ، - دەدى مينيستر. ونىڭ اتاپ وتۋىنشە، اتالعان شەشىمگە سايكەس مەديتسينا قىزمەتكەرلەرى جۇمىسىنىڭ قاۋىپتىلىگىنە قاراي 3 توپقا بولىنگەن. «ءبىرىنشى توپ - بۇل رەانيماتسيا بولىمدەرىمەن قوسا العاندا جۇقپالى اۋرۋلار ستانتسيونارلارىنىڭ دارىگەرلەرى، ورتا جانە كىشى مەديتسينا قىزمەتكەرلەرى. بارلىعى - 3284 مامان. ولاردىڭ جالاقىسىنا ۇستەمەاقى ايىنا 850 مىڭ تەڭگەنى قۇرايدى. ياعني، ورتاشا ايلىعىن قوسقاندا ولار ايىنا شامامەن 1 ميلليون تەڭگەنىڭ ۇستىندە الادى. ەكىنشى توپ - پروۆيزورلىق ستاتسيونار مەن جەدەل جاردەم قىزمەتتەرىنىڭ دارىگەرلەرى، ورتا جانە كىشى مەديتسينا قىزمەتكەرلەرى. بارلىعى - 11951 مامان. ولاردىڭ ۇستەماقىسى ايىنا 425 مىڭ تەڭگەنى قۇرايدى. ياعني، ورتاشا ايلىعىن قوسقاندا ولار ايىنا شامامەن 600 مىڭ تەڭگە الادى» ، - دەدى داۋرەن ابايەۆ.

ءمينيستردىڭ ايتۋىنشا، ءۇشىنشى توپقا كارانتيندىك ستاتسيونار دارىگەرلەرى، ورتا جانە كىشى مەديتسينا قىزمەتكەرلەرى، سانيتارلىق دارىگەرلەر، جەدەل جاردەم جۇرگىزۋشىلەرى جانە تاعى باسقالارى كىرەدى. «بارلىعى - 10994 قىزمەتكەر. ولار ايىنا 212 مىڭ تەڭگە ۇستەمەاقى الادى. ياعني، ورتاشا ايلىعىن قوسقاندا ولار شامامەن 380 مىڭ تەڭگە الادى» ، - دەدى ول.

اۆتور: مارلان جيەمباي