قازاقستاندىق ۆەب-سايتتارعا كىرۋ تەگىن بولادى

نۇر-سۇلتان. قازاقپارات - بايلانىس وپەراتورلارى توتەنشە جاعداي كەزىندە ءوز ابونەنتتەرىنە قازاقستاندىق دومەندىك ايماقتا ورنالاسقان ينتەرنەت-رەسۋرستارعا قوسىمشا تولەمسىز كىرۋگە، ءتىپتى تەلەفون تەڭگەرىمىندە قاراجات جوق بولعان جاعدايدا دا قوسىلۋعا مۇمكىندىك بەرەتىن ءتۇرلى شەشىمدەر مەن تاريفتىك جوسپارلار ۇسىنۋدا.

بۇل تۋرالى تولىعىراق ازاماتتار ءوز بايلانىس وپەراتورىنان انىقتاي الادى. ەل پرەزيدەنتىنىڭ ت ج رەجيمى كەزىندە قازاقستاندىقتارعا قولداۋ كورسەتۋ جونىندەگى تاپسىرماسىن بايلانىس وپەراتورلارىنىڭ ورىنداۋ بارىسى تۋرالى ق ر سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگىنىڭ ماماندارى ايتىپ بەردى ، دەپ حابارلايدى قازاقپارات.

وقۋ ورىندارىنىڭ قاشىقتان وقىتۋ فورماتىنا كوشۋىنە بايلانىستى ينتەرنەتتى تەگىن پايدالانۋدىڭ ماڭىزى زور.

ەلىمىزدىڭ ءىرى بايلانىس وپەراتورلارى، ونىڭ ىشىندە «قازاق تەلەكوم» ا ق، «ترانستەلەكوم» ا ق، «Astel» ا ق، «كار-تەل» ج ش س، «كسەل» ا ق، «موبايل تەلەكوم- سەرۆيس» ج ش س بۇدان بۇرىن ج و و سايتتارىن، ەلەكتروندىق انىقتامالىق دەرەكتەر بازاسىن، ونلاين-كۇندەلىك، ەلەكتروندى ءبىلىم بەرۋ پورتالدارىن جانە ق ر ءبىلىم جانە عىلىم مينيسترلىگى ۇسىنعان باسقا دا ءبىلىم بەرۋ رەسۋرستارىنا تەگىن قوسىلۋ مۇمكىندىگىن ۇسىنعان ەدى.

سونىمەن قاتار، https://www.coronavirus2020.kz/kz كوروناۆيرۋس تۋرالى رەسمي ينتەرنەت- رەسۋرسىن، https://egov.kz/cms/kk ەلەكتروندىق ۇكىمەت پورتالى مەن eGov Mobile ءموبيلدى قوسىمشاسىن پايدالانۋ كەزىندە ترافيك ەسەپتەلمەيدى جانە مەگابايت شەگەرىلمەيدى. مەديتسينا قىزمەتكەرلەرىنە قولداۋ كورسەتۋ ماقساتىندا «كسەل» ا ق، «كار-تەل» جانە «موبايل تەلەكوم- سەرۆيس» ج ش س كوروناۆيرۋس ىندەتىنە قارسى كۇرەسىپ جاتقان بارلىق دارىگەرگە تەگىن ۇيالى بايلانىس قىزمەتىن ۇسىندى.

رەسپۋبليكا بويىنشا 20000 نان استام مەديتسينا قىزمەتكەرى ت ج كەزىندە ۇيالى بايلانىسپەن ينتەرنەت پاكەتىن تەگىن پايدالانۋدا. ازاماتتاردىڭ ەپيدەميولوگيالىق جاعدايدان حاباردار بولۋى ءۇشىن ۇيالى بايلانىس وپەراتورلارى 1406 call-ورتالىعىنا ۇيالى تەلەفوننان تەگىن قوڭىراۋ شالۋ مۇمكىندىگىن ۇسىندى.

ازاماتتار اتالعان ورتالىققا قوڭىراۋ شالۋ ارقىلى مامانداردان قاجەتتى دارىگەرلىك كەڭەس الا الادى. «قازاق تەلەكوم» ا ق جانە «ترانستەلەكوم» ا ق ت ج كەزەڭىندە بەكىتىلگەن بايلانىس، ينتەرنەت جانە سيفرلىق تەليەۆيزيا قىزمەتتەرى ءۇشىن تولەم جاساماعان، ياعني قارىزى بار جەكە تۇلعالاردى اتالعان قىزمەتتەردەن اجىراتىپ تاستاماۋ تۋرالى شەشىم قابىلدادى.

ت ج رەجيمى كەزىندە «كار-تەل» ج ش س الەۋمەتتىك تاريفتىك جوسپارىن پايدالاناتىن ابونەنتتەرىنە، ياعني زەينەتكەرلەر، مۇمكىندىگى شەكتەۋلى جاندار مەن مۇعالىمدەرگە تەگىن بايلانىس جانە ينتەرنەت پاكەتتەرىن ۇسىنادى. سونداي-اق، بارلىق ۇيالى بايلانىس وپەراتورلارى روۋمينگتەگى ءوز ابونەنتتەرىن بونۋستىق تەڭگەرىممەن نەمەسە الەۋمەتتىك جەلىلەرگە تەگىن ينتەرنەت-ترافيكپەن جانە تۋىستارىمەن بايلانىسۋ ءۇشىن تەگىن مەسسەندجەرلەرمەن قامتاماسىز ەتتى.

ت ج رەجيمى كەزىندە كاسىپكەرلەرگە قولداۋ كورسەتۋ ءۇشىن كەيبىر وپەراتورلار ينتەرنەت قىزمەتتەرىنە، كارانتينگە جابىلعان ساۋدا جانە قىزمەت كورسەتۋ ورىندارىن قاشىقتان باقىلاۋ ءۇشىن بەينەباقىلاۋ قىزمەتىنە تولەم جۇرگىزۋ ءتارتىبى جەڭىلدەتىلگەن ارنايى تاريفتىك جوسپارلار ازىرلەدى.

قازىرگى ۋاقىتتا بايلانىس وپەراتورلارىنىڭ كۇشەيتىلگەن جۇمىس رەجيمىنە كوشكەنىن ايتىپ وتكەن ءجون.

كوممۋنيكاتسيا جەلىلەرىنىڭ ۇزدىكسىز جۇمىس ىستەۋى ءۇشىن بايلانىس ارنالارىنا تاۋلىك بويى مونيتورينگ جۇرگىزىلەدى. سونداي-اق بايلانىس وپەراتورلارى 1414 call-ورتالىعىنىڭ جۇمىسىن كۇشەيتۋ جانە مەملەكەتتىك قىزمەتشىلەردىڭ قاشىقتان جۇمىس رەجيمىنە كوشۋى ءۇشىن ءبىرقاتار ۇيىمداستىرۋ شارالارىن قابىلدادى.