ەلوردادا جۇمىسسىز قالعان ازاماتتارعا تولەم بەرۋ باستالدى

نۇر-سۇلتان. قازاقپارات - ەلوردادا جۇمىسسىز قالعان ازاماتتارعا تولەم بەرۋ باستالدى.

بۇل تۋرالى ورتالىق كوممۋنيكاتسيالار قىزمەتىندەگى بريفينگتە نۇر-سۇلتان قالاسى اكىمىنىڭ ورىنباسارى باقتيار ماكەن ايتتى، دەپ حابارلايدى قازاقپارات ءتىلشىسى.

«ەلباسى، «Nur Otan» پارتياسىنىڭ ءتوراعاسى نۇرسۇلتان نازاربايەۆتىڭ تاپسىرماسىن قولداۋ ماقساتىندا قالالىق ەرىكتىلەر پارتيانىڭ ۆولونتەرلەرىمەن بىرلەسىپ، «Birgemiz» اكتسياسىنىڭ اياسىندا 5 مىڭنان استام وتباسىعا ءتيىستى الەۋمەتتىك كومەك كورسەتۋى جالعاسۋدا.

سونىڭ ىشىندە 3,5 مىڭ وتباسىعا، اتاپ ايتقاندا جالعىز تۇراتىن زەينەتكەرلەرگە، مۇمكىندىگى شەكتەۋلى ازاماتتارعا، حالىقتىڭ الەۋمەتتىك جاعىنان وسال توپتارىنىڭ وكىلدەرىنە اتاۋلى كومەك كورسەتىلۋدە»، - دەدى باقتيار ماكەن.

قالا اكىمىنىڭ ايتۋىنشا، مۇنان بولەك، 25- ناۋرىزدان بەرى ەلوردا ۆولونتەرلەرى مەديتسينالىق قىزمەتكەرلەرمەن بىرلەسىپ، ديسپانسەرلىك ەسەپتە تۇرعان ەگدە جاستاعى ازاماتتاردىڭ ۇيلەرىنە ءدارى-دارمەكتەردى جەتكىزۋدە.

كارانتين كەزەڭىندە «قازپوشتانىڭ» قىزمەتكەرلەرى ەرىكتىلەرمەن بىرلەسىپ، زەينەتاقىنى اقشالاي الاتىن ازاماتتارعا ونى ۇيلەرىنە جەتكىزىپ بەرەدى.

«مەملەكەت باسشىسى جۇمىسسىزدىقتى شەشۋ ماقساتىندا ءتيىستى ماسەلەلەرگە توقتالىپ، تاپسىرما بەرگەن بولاتىن. سوعان بايلانىستى قالامىزدا ءتيىستى جۇمىستار باستالىپ كەتتى. جۇمىسسىز قالعان ازاماتتارعا بۇگىننەن باستاپ جۇمىس ورتالىقتار ارقىلى ونلاين نەگىزدە تولەم بەرۋ باستالادى.

300 ءوتىنىش تۇسكەن بولاتىن. سولاردىڭ ءبارى بۇگىننەن باستاپ الادى. ونىڭ كولەمى 42500 تەڭگە كولەمىندە بەكىتىلگەن. مەملەكەت دەگەنىمىز ءسىز بەن ءبىز. ءبىز ءبىر-ءبىرىمىزدى قيىن-قىستاۋ كەزەڭدە ەشقاشان ۇمىت قالدىرمايمىز. الەۋمەتتىك از قامتىلعان وتباسىلار مەن مۇقتاج ازاماتتارعا ازىق-تۇلىك، ءدارى-دارمەك ۋاقتىلى جەتكىزىلىپ جاتىر.

بۇل - اۋىرتپالىق كەزەڭى. ءبىر-ءبىرىمىزدى سىنايتىن ەمەس، بىرلىگىمىز سىنالاتىن كەز. سوندىقتان، ءتارتىپ ساقتاپ، كۇندىز-ءتۇنى ۇيقى كورمەي اۋىرعان ازاماتتاردى ەمدەپ جۇرگەن مەديتسينا قىزمەتكەرلەرىنە ۇيدە وتىرىپ كومەكتەسەيىك»، - دەدى ەلوردا اكىمىنىڭ ورىنباسارى.