توتەنشە جاعداي كەزىندە جۇمىس ىستەگەن بۋكمەكەر اكىمشىسى قاماۋعا الىندى
وسىنداي جاعدايعا قاراماستان توتەنشە جاعداي رەجيمىن بۇزىپ، پايدا تابۋ ءۇشىن جۇمىسىن جالعاستىرىپ كەلە جاتقان كاسىپكەرلىك نىساندارى ءالى انىقتالۋ ۇستىندە.
بۇل تۋرالى قازاقپارات تۇركىستان وبلىستىق پوليتسيا دەپارتامەنتىنە سىلتەمە جاساپ حابارلايدى. تۇركىستان وبلىسى پوليتسيا دەپارتامەنتىنىڭ جەكە قۇرامى كۇشەيتىلگەن رەجيمدەگى قىزمەتكە كوشكەن. ياعني كۇنى-ءتۇنى رەيد جۇمىستاردى جۇرگىزىلىپ، ادام كوپ جينالاتىن باسقوسۋلار، توي-جيىندار، ءىس-شارالاردى وتكىزۋگە تىيىم سالىپ، قاۋىپسىزدىك شارالارىن قاداعالاۋدا.
وسىنداي كەزەكتى رەيد بارىسىندا سوزاق اۋدانىنىڭ پوليتسەيلەرى، اۋىلداردىڭ بىرىندە بۋكمەكەرلىك كەڭسەنىڭ جۇمىس جاساپ جاتقانىن انىقتادى.
مۇنى انىقتاعان پوليتسەيدىڭ ايتۋىنشا، توتەنشە جاعداي جاريالانىپ، تىيىم سالىنعاننان كەيىن، ياعني 18-19-ناۋرىز كۇندەرى ويىن-ساۋىق ورىندارىنىڭ جۇمىسى توقتاتىلۋى كەرەك دەپ، اتالعان بۋكمەكەرلىك كەڭسەگە بىرنەشە رەت ەسكەرتۋ جاساعان. الايدا بۋكمەكەرلىك كەڭسە اكىمشىسى وعان قۇلاق اسپاي 23-ناۋرىز كۇنى ادام قابىلداپ وتىرعانى بەلگىلى بولدى.
«قازاقستان رەسپۋبليكاسى پرەزيدەنتىنىڭ 2020-جىلعى 15 -ناۋرىز جارلىعىنىڭ تالاپتارىن ورەسكەل بۇزعان اتالمىش تۇرعىنعا ق ر اكىمشىلىك قۇقىقبۇزۋشىلىق كودەكسىنىڭ 476-بابى «توتەنشە جاعداي رەجيمىن بۇزۋ» بويىنشا حاتتاما ءتۇزىلىپ، اۋداندىق سوتتىڭ قاۋلىسىمەن كىنالى دەپ تانىلىپ، 5 تاۋلىككە اكىمشىلىك قاماققا الىندى.
«تۇركىستان وبلىسىنىڭ پوليتسەيلەرى ويىن-ساۋىق، ساۋدا ورتالىقتارى مەن ءدامحانا-بار، تويحانا يەلەرىنە ەسكەرتەدى: توتەنشە جاعداي كەزىندە زاڭ تالاپتارىنا سايكەس ارەكەت ەتىپ، مۇمكىندىگىنشە كوپ ادام شوعىرلانۋىنا جول بەرمەڭىزدەر. بۇل ءوزىڭىزدىڭ دە، وزگەلەردىڭ دە دەنساۋلىقتارى ءۇشىن قاجەت بولماق»، - دەلىنگەن حابارلامادا.