رەسەيلىك عالىمدار كوروناۆيرۋسقا قارسى ءۇش ءدارى ازىرلەدى

نۇر -سۇلتان. قازاقپارات – رەسەيلىك دارىگەرلەر COVID-19 كوروناۆيرۋس ينفەكسياسىن ەمدەۋدە قولدانىلاتىن ءۇش دارىلىك پرەپاراتتى ازىرلەدى.

بۇل تۋرالى رەسەي عىلىم اكادەمياسىنىڭ مەديك- بيولوگيالىق سەكسياسىنىڭ جەتەكشىسى ۆلاديمير چەحونين ريا نوۆوستي اگەنتتىگىنە بەرگەن سۇحباتى بارىسىندا ايتتى.

ونىڭ ايتۋىنشا، بىرنەشە جىل بۇرىن رەسەيدە ۆيرۋسقا قارسى تريازاۆيرين ءدارىسى شىعارىلعان. قىتايلىق ماماندار بۇل پرەپاراتتى كوروناۆيرۋستىق ينفەكسيانى ەمدەۋدە قولدانۋ ءۇشىن قىزىعۋشىلىق تانىتقان.

«ءبىراق بۇگىن تەك رەسپيراتورلىق ۆيرۋستى ينفەكسيانى ەمدەۋدە قولدانىلاتىن وسى پرەپاراتتىڭ ەرەكشە، ينگالياتسيالىق فورماسى دايىن. مەن ونىڭ COVID-19 ينفەكسياسىن ەمدەۋدە ەڭ قولايلى بولاتىنىنا سەنىمدىمىن. جانە، ارينە، قازىرگى جاعدايدا مۇنداي مۇمكىندىك وتە ماڭىزدى»، - دەدى چەحونين.

«تريازاۆيريننىڭ دارىلىك ءتۇرى ەلىمىزدەگى مامانداندىرىلعان مەكەمەلەردە قولدانۋ ءۇشىن بەرۋگە دايىن تۇر»، - دەيدى عالىم.

سونداي-اق، ماماننىڭ ايتۋىنشا، رەسەيلىك ماماندار فاۆيپيراۆير ۆيرۋسقا قارسى پرەپاراتىنىڭ وتە ءتيىمدى سينتەز جۇيەسىن ازىرلەگەن. بۇل پرەپاراتتى بۇعان دەيىن جاپونيادا ر ن ق- ۆيرۋستارى ارقىلى پايدا بولاتىن ينفەكسيالاردى (قازىرگى COVID-19 ۆيرۋسى دا كىرەدى - رەد. ) ەمدەۋ ءۇشىن قولدانىپ كەلگەن.

«مەنىڭ بىلۋىمشە، بۇل پرەپارات مامانداندىرىلعان كلينيكالاردا قولدانۋ ءۇشىن دايىن. ءۇشىنشى پرەپارات - فورتەپرەن. جانۋارلارداعى كوروناۆيرۋستىق ينفەكسيانى ەمدەۋدە قولدانىلاتىن ۆەتەرينارلىق فوسپرەنيل پرەپاراتىنىڭ نەگىزىندە جاسالعان. بۇل ءدارى كلينيكالىق سىناقتاردىڭ بارلىق كەزەڭىنەن ءوتتى. ياعني ادامدارعا دا جاسالدى. فورتەپرەن قازىر تىركەۋ كەزەڭىندە تۇر. تىركەۋدەن وتكەن سوڭ ونىڭ COVID-19 ۆيرۋسىن ەمدەۋدەگى بەلسەندىلىگىن تەكسەرۋ ءۇشىن سىناپ كورەمىز»، - دەدى اكادەميك.

چەحونيننىڭ مالىمدەۋىنشە، «وسى ءۇش دارىلىك زات رەسەيدىڭ دەنساۋلىق ساقتاۋ مينيسترلىگىن قىزىقتىرعان جانە بۇگىندە عىلىم اكادەمياسى مەن ب ع م حيميالىق بولىمشەلەرىنىڭ جۇمىسىندا وسى دارىلەرگە باسىمدىق بەرىلىپ وتىر».

سونىمەن قاتار، چەحونين رەسەيلىك عالىمداردىڭ كوروناۆيرۋسقا قارسى ءۇش وڭتايلى ۆاكسينانى ازىرلەپ جاتقانىن حابارلادى.

ونىڭ ايتۋىنشا، ۆاكسينالار لومونوسوۆ اتىنداعى م م ۋ بيولوگيالىق فاكۋلتەتىنىڭ، اكادەميك الەكساندر گابيبوۆتىڭ جەتەكشىلىگىمەن شەميانكين جانە وۆيننيكوۆ اتىنداعى بيوورگانيكالىق حيميا ينستيتۋتىنىڭ، سونداي-اق ۆاۆيلوۆ اتىنداعى جالپى گەنەتيكا ينستيتۋتىنىڭ بازاسىندا ازىرلەنىپ جاتىر.

بۇل تۋرالى tengrinews.kz اقپاراتتىق پورتالى حابارلاعان بولاتىن .