+7 (701) 759 90 19
20 °С : نۇر-سۇلتان
31 °С : الماتى
USD 413.12 EUR 452.86
RUB 5.82 CNY 57.92
جاڭالىقتار

ارباعا تاڭىلعان ەرلى- زايىپتىلار: كوڭىلىڭ كەمتار بولماۋى كەرەك

29 ناۋرىز 11:35
:ءبولىسۋ
ارباعا تاڭىلعان ەرلى- زايىپتىلار: كوڭىلىڭ كەمتار بولماۋى كەرەك

زايسان. قازاقپارات - شىعىس قازاقستان وبلىسى زايسان اۋدانىندا بەس كۇندىك دۇنيەنىڭ سىناعىنا قايسارلىق پەن توزىمدىلىك تانىتا بىلگەن ەرلى- زايىپتىلار تۇرادى.

ەكەۋى دە I توپ مۇگەدەگى وجەتبەك ماجەن ۇلى مەن گۇلنار يحاي قىزى ءبىر شاڭىراقتىڭ شامىن جاعىپ، ءتۇتىنىن تۇتەتىپ كەلە جاتىر. ءبىر- ءبىرىنىڭ جۇرەك مۇڭدارىن شىنايى تۇسىنەتىن ولار ۇلى سەزىم - ماحابباتتىڭ ارقاسىندا تاعدىر تالقىسىنا مويىماي، الداعى كۇنگە زور ۇمىتپەن قارايدى.

وجەتبەكتىڭ ءور مىنەزى

زايسان اۋدانى كەڭساي اۋىلىنىڭ تۇرعىنى وجەتبەك ماجەن ۇلى 2007 -جىلى قىتايدان اتامەكەنىنە ورالعان. قىتاي ەلىنەن كەلگەن ازامات 23 جاسىندا ۇيلەنىپ، ءبىر ۇل، ءۇش قىزدىڭ اكەسى اتانادى.

«بۇرىن قىتاي قالالارىنىڭ بىرىندەگى اكىمشىلىكتە كولىك جۇرگىزۋشىسى بولىپ جۇمىس ىستەگەن ەدىم. سونداي كۇندەردىڭ بىرىندە 2005 -جىلى كولىگىمدى توقتاتا بەرگەندە تۇتقيىلدان ءبىر كولىك كەلىپ سوقتىعىستى. ول كەزدە 28 جاستا ەدىم. جول اپاتىنان مويىن ومىرتقاما زاقىم كەلدى. ءسويتىپ، توسەكتەن تۇرا الماي جاتىپ قالدىم. ارادا ەكى جىل وتكەندە اتاجۇرتقا ورالدىق، الايدا كەلەڭسىز جايتتاردان سوڭ ءبىرىنشى جۇبايىممەن اجىراستىم. بالالارىم ءوز قولىمدا قالدى» ، - دەپ ەسكە الدى ول.

«جالعىزدىق قۇدايعا عانا جاراسادى» دەمەكشى، وجەتبەكتىڭ سىنىپتاسى سەبەپشى بولىپ، كەيىپكەرىمىز قازىرگى جۇبايىمەن تانىسقان. ارادا ۇلكەن سىيلاستىق پەن شىنايى سەزىمنىڭ وتى لاۋلاپ، ەكەۋى قالعان عۇمىرلارىن قول ۇستاسىپ بىرگە وتكىزۋگە ءسوز بايلاسادى. «قۋانىشتى بولىسسەڭ - كوبەيەدى، قايعىنى بولىسسەڭ - ازايادى» دەگەندەي، ءبىر- بىرىنە ومىرلىك سەرىك بولعان ولار تاعدىردىڭ اشىسىن دا، تۇشىسىن دا بىرگە تاتىپ كەلەدى. جانۇيانىڭ وتاعاسى مەن وتاناسى ءبىرىنشى توپتاعى مۇگەدەك جاندار بولعاندىقتان، مەملەكەت تاراپىنان اي سايىن جاردەماقى الادى. بۇدان بولەك، ولارعا اۋدان اكىمدىگى تاعايىنداعان جەكە كومەكشى كەلىپ، ءۇي شارۋاسىنا قولعابىس تيگىزىپ تۇرادى ەكەن. ەكى جارتى - ءبىر ءبۇتىن وجەتبەكتىڭ شاڭىراعىنىڭ جىلۋىن كىرگىزىپ، مەيىرىمىن توگىپ وتىرعان گۇلنار يحاي قىزى ەندى عانا تەڭ قۇربىمەن بوي تۇزەپ كەلە جاتقان شاعىندا اياق استىنان اتتان قۇلاپ، جۇلىنىنا زاقىم كەلتىرىپ العان. جىلى جۇزىمەن ءۇيدىڭ شىرايىن كەلتىرەتىن گۇلناردىڭ جانۇياسى موڭعوليا ەلىنەن تالدىقورعانعا 1991 -جىلى كوشىپ كەلىپتى. 17 جاسىندا مۇگەدەك ارباسىنا تاڭىلعان گۇلنار ەشقايدا شىقپاي، بار ۋاقىتىن اناسىنىڭ قاسىندا وتكىزگەن. ءبىر اللادان عانا دۇعا تىلەپ وتىراتىن كوڭىلى قارداي اپپاق ايەل بولاشاقتا ەم- دومنىڭ ساۋابى بولاتىنىنان دا ءۇمىتتى، ارينە.

«مەن وجەتپەكپەن 2015 -جىلى تالدىقورعانداعى سىنىپتاسى ارقىلى تانىستىم. باسىندا تەلەفونمەن سويلەسىپ جۇردىك. العاشىندا ءبىر- بىرىمىزدەن تىم الىستا تۇراتىندىعىمىزدى ايتىپ ەكى جاقتاعىلار دا قارسى بولدى. اپايلارىم مەن اعالارىم «قينالىپ قالاسىڭ عوي، قاجەت ەمەس- اۋ» دەپ ەكى جارتى ءبىر ءبۇتىن بولىپ قوسىلۋىمىزعا قارسىلىق ءبىلدىردى. بالالارى بار ەكەندىگىن ايتىپ، ولاردىڭ كوزقاراسى قالاي بولاتىندىعىن ۋايىمدادى. «قول قۋسىرىپ قاراپ وتىرعان ادام اللاعا دا جاقپاس» دەيدى عوي، ەڭ بولماسا ازاماتتىڭ ءبىر شاۋگىم ءشايىن قايناتىپ بەرەيىن دەپ بەكىندىم» ، - دەيدى گۇلنار يحاي قىزى.

اق حالاتتى ابزال جاندار وتاعاسىنا «ۋاقىتىمەن ەم جۇرگىزسە، ناتيجە شىعۋى مۇمكىن» دەپ ايتقان ەكەن. وسىدان كەيىن وجەتبەك نۇر- سۇلتان قالاسىندا ءبىر جارىم جىلعا جۋىق ەمدەلىپ، قازىر قاراجات تاپشىلىعىنان امالسىز ەمىن توقتاتقان. جىلدان اسا جۇرگىزىلگەن ەمنىڭ ارقاسىندا وجەتبەك قازىر اقىرىن قوزعالىپ، ارباعا وتىراتىن بولعان. ەمىن تاعى دا جالعاستىرىپ، شيپاسى تابىلسا اياعىنان تىك تۇرىپ، ەل قاتارلى جۇرۋگە ءالى دە بولسا ءۇمىتى بار.

«ەلوردادا اۋرۋحانادا جاتقانىمدا قاسىمداعى ءوزىم سياقتى تاعدىرلاس ادامدارمەن كەزدەسىپ، رۋحاني كۇش الدىم. ەڭ باستىسى، كوڭىلىڭ كەمتار بولماۋى كەرەك. كەربەز كوڭىلدى شاڭ باسىپ، قارا بۇلت ۇيىرىلگەندە، جانىڭا جاقىن جاندار رۋحاني دەمەۋ بەرسە قيىندىقتى وڭاي ەڭسەرۋگە بولادى» ، - دەيدى قايسار ازامات.

جۇرەك سىرىن جىرمەن جەتكىزەدى جاستايىنان ولەڭ جازىپ، ىشكى سەزىم- تولعانىسىن قاعاز بەتىنە ءتۇسىرىپ ۇيرەنگەن وجەتبەك اياۋلى جارىنا دەگەن سەزىمىن دە ولەڭ جولدارىمەن كەستەلەيدى. ءبىز ونىڭ ولەڭدەرىنەن جۇرەگىنە ءۇمىت شىراعىن جاعىپ، جاسىعان كوڭىلىن قايتا جانداندىرعان اياۋلى جارىنا دەگەن كاۋسار سەزىمىن اڭعاردىق.

* (وجەتبەكتىڭ ءبىر ولەڭىنەن ءۇزىندى)

كۇنسىڭ سەن نۇرىڭدى شاشقان،

ءتۇن ىزعارىنىڭ شىقتارى قاشقان.

تۇنەگىمە جانىم، اي بولىپ كەلىپ،

جۇرەگىمە ءۇمىت شىراعىن جاققان.

جارالى جۇرەك، جاسىعان كوڭىل،

وياتتى مەنى سەزىمىڭ ماقپال.

ورمانىم تولقىپ، جاپىراق جايدى،

تاسىندى كوڭىل اعىل دا تەگىل.

اۆتور: تالعاتجان مۇحامەتبەك ۇلى



باستى سوزدەر: ايماق,
:ءبولىسۋ
پئكئر قالدئرؤ
+7
جئبةرؤ
ونلاين قىزمەتكەرلەر
رەداكتور
باقىتجول كاكەش
باقىتجول كاكەش
954-049
رەداكتور
ريزابەك نۇسىپبەك
ريزابەك نۇسىپبەك
954-049
رەداكتور
بەيسەن سۇلتان
بەيسەن سۇلتان
954-049

مۇراعات