+7 (701) 759 90 19
20 °С : نۇر-سۇلتان
31 °С : الماتى
USD 413.12 EUR 452.86
RUB 5.82 CNY 57.92
جاڭالىقتار

بارلىعى زاڭ اياسىندا بولادى - بەردىبەك ساپاربايەۆ قورداي تۇرعىندارىمەن كەزدەستى

29 ناۋرىز 10:41
:ءبولىسۋ
بارلىعى زاڭ اياسىندا بولادى - بەردىبەك ساپاربايەۆ قورداي تۇرعىندارىمەن كەزدەستى

تاراز. قازاقپارات - جامبىل وبلىسىنىڭ اكىمى بەردىبەك ساپاربايەۆ سورتوبە اۋىلىندا قورداي اۋدانىنداعى توتەنشە جاعدايلاردىڭ سالدارىن جويۋ جونىندەگى شتابتىڭ كەزەكتى وتىرىسىن وتكىزدى، دەپ حابارلايدى قازاقپارات وبلىس اكىمىنىڭ باسپا ءسوز قىزمەتىنە سىلتەمە جاساپ.

ايماق باسشىسى اۋدانعا جۇمىس ساپارى بارىسىندا «بەيبىتشىلىك پەن كەلىسىم» پيلوتتىق جوباسىن جۇزەگە اسىرۋ بويىنشا اتقارىلىپ جاتقان جۇمىستاردىڭ ەسەبىن تىڭداپ، جەرگىلىكتى تۇرعىندارمەن كەزدەستى. وبلىس اكىمى اتالمىش جوبا اياسىندا 13 مىڭنان استام قوردايلىقتى قامتىعان 400 دەن استام ءىس- شارا وتكىزىلگەندىگىن اتاپ ءوتتى. ەندى تالداۋ بارىسىندا انىقتالعان تۇيتكىلدەردى شەشۋ ءۇشىن جۇيەلى جۇمىس ىستەۋ قاجەت. بۇل تۋرالى وبلىستىق سالالىق باسقارمالاردىڭ باسشىلارى - جۇمىس توپتارىنىڭ جەتەكشىلەرى ەگجەي- تەگجەيلى باياندادى. ولار جوبانىڭ اقپاراتتىق- ءتۇسىندىرۋ جۇمىستارى، الەۋمەتتىك، كاسىپكەرلىكتى دامىتۋ، ءدىن جانە قاۋىپسىزدىك ماسەلەلەرى باعىتتارى بويىنشا قولعا الىنعان شارالارعا جان- جاقتى توقتالىپ ءوتتى. ءبىر اپتا ىشىندە حالىقپەن ءتۇرلى كەزدەسۋلەر وتكىزگەن جۇمىس توپتارى اۋىل تۇرعىندارىنىڭ تىرشىلىگىنە قاتىستى بارلىق سالالاردى قامتىعان. ءوڭىر باسشىسى قوردايلىقتاردىڭ وزەكتى ماسەلەلەرىنە ايرىقشا نازار اۋدارىپ، اۋىلدىقتاردىڭ كاسىپكەرلىك باستامالارىن قولداۋ ءۇشىن قوسىمشا گرانتتار مەن شاعىن نەسيەلەر ءبولۋ شارالارى باستالعانىنا، اسىراۋشىسىنان ايىرىلۋىنا بايلانىستى ءتيىستى جاردەماقىلاردىڭ رەسىمدەلگەنىنە جانە ونىڭ ۋاقىتىندا تولەنەتىنىنە سەندىردى. سونىمەن قاتار، يمامداردىڭ روتاتسياسى سياقتى ماڭىزدى ماسەلەلەرگە دە كوڭىل ءبولۋ كەرەكتىگى ايتىلدى.

اۋداندىق ءماسليحات دەپۋتاتى قارلىعاش قىپشاقبايەۆا اتالعان جوبا قورداي تۇرعىندارىنىڭ ءومىرىن جاقسارتۋعا قاۋقارلى ەكەندىگىن تىلگە تيەك ەتسە، ال قورداي اۋىلىنىڭ تۇرعىنى بولات اناربەكوۆ نەسيە بەرۋ جانە قۇجاتتاردى راسىمدەۋ بويىنشا ءتيىستى مامانداردىڭ ءجيى كەلىپ، جەرگىلىكتى حالىققا كەڭەس بەرىپ وتىرۋى بويىنشا ءوتىنىشىن جەتكىزدى. ماسانشى اۋىلدىق وكرۋگى ارداگەرلەر كەڭەسىنىڭ ءتوراعاسى ديدەر دۆۋماروۆ 100 دەن استام دۇنگەندىك وتباسى ءداستۇر بويىنشا شۋ اۋدانىنا اتتانعانىن حابارلادى. بەردىبەك ساپاربايەۆ بۇعان دەيىن مۇنداي وتباسىلاردىڭ سانى 300 گە جۋىق بولعانىنا توقتالىپ، جەرگىلىكتى حالىقتىڭ وندا كەدەرگىسىز بارا الاتىنىن، جەر ءبولۋ ماسەلەسىندە ەشقانداي كەدەرگىلەر تۋىندامايتىنىن باسا ايتتى. بۇل ماسەلە ايماق باسشىسىنىڭ تىكەلەي باقىلاۋىندا.

«سىزدەر تەك وزدەرىڭىز ءۇشىن عانا جۇمىس ىستەپ قويماي، وبلىستىڭ جانە جالپى ەلدىڭ ازىق- تۇلىك قاۋىپسىزدىگىنە دە ۇلەس قوسا الاسىزدار. بۇل وتە ماڭىزدى. اسىرەسە قازىرگىدەي كۇردەلى جاعدايدا بۇعان ايرىقشا دەن قويعان ابزال» ، - دەپ اتاپ ءوتتى ول.

سورتوبە اۋىلىنىڭ يمامى عۇبار پانشاروۆ قورداي اۋىلدارى قالىپتى تىرشىلىكتەرىن جالعاستىرىپ وتىرعاندىعىن تىلگە تيەك ەتىپ، كارانتيندىك شارالاردى بارىنشا ساقتاۋعا اتسىلىساتىندىقتارىن ءبىلدىردى. كەزدەسۋدى قورىتىندىلاي كەلە، ايماق باسشىسى ءاربىر ايتىلعان ماسەلەگە كوڭىل ءبولىپ، بيلىك ءوز مىندتتەرىن كۇمانسىز ورىندايتىنىن جەتكىزدى. بەكىتىلىگەن جول كارتاسىنا ەنگەن بارلىق ماسەلەلەر بىرتىندەپ شەشىلمەك. ايماق باسشىسى ونىڭ ورىندالۋىنا تىكەلەي ءوزى قاداعالاۋ جاساپ وتىرادى.

«تۇرعىندارمەن ءجيى كەزدەسىپ وتىرۋ كەرەك. جوبادان الاتىن باستى ساباعىمىز سول. مەملەكەت باسشىسى ەكونوميكانى دامىتۋ جانە قازاقستاندىقتاردىڭ الەۋمەتتىك جاعدايىن جاقسارتۋ جونىندە ناقتى شارالار قابىلداۋدا. قورداي اۋدانىنا دا ءتيىستى قاراجات ءبولىندى. ول وڭايلاتىلعان تارتىپتە بەرىلەتىن بولادى. جەرگىلىكتى تۇرعىندار جاڭا جوبالارمەن جۇمىس ىستەۋى ءتيىس. شەكاراداعى باقىلاۋدى، كونترابانداعا جانە قىلمىستىڭ باسقا دا تۇرلەرىنە قارسى كۇرەستى كۇشەيتەمىز. مەكتەپتەردەگى ءبىلىم بەرۋ دەڭگەيى تومەن كۇيىندە قالىپ وتىر. جەرگىلىكتى وقۋ ورىندارىن بىلىكتى كادرلارمەن قامتاماسىز ەتۋ ماسەلەسىن پىسىقتاۋ قاجەت. وقۋ ءۇشىن كورشى قىرعىزستانعا بارۋدىڭ قاجەتى جوق. ءبىز سورتوبە مەن ماسانشى اۋىلدارىنىڭ اراسىندا ورنالاساتىن كوللەدج قۇرىلىسىن جۇرگىزۋدى جوسپارلاپ وتىرمىز» ، - دەدى ايماق باسشىسى.

بەردىبەك ساپاربايەۆ ءاربىر اۋداندا ماگنيتتى- رەزونانستىق توموگرافيا اپپاراتى بولاتىن بولسا، ادامدار قۇنى قىمبات تالداۋ شارالارى ءۇشىن وبلىس ورتالىعىنا سابىلمايتىنىنا نازار اۋدارتتى. كەز كەلگەن اۋرۋدى ەمدەۋدەگى ەڭ باستى ماسەلە - ءدال قويىلعان دياگنوز ەكەندىگىن العا تارتتى. «قورداي اۋدانىندا زارداپ شەككەن ۇيلەردى قالپىنا كەلتىرۋ جۇمىستارى جاقىن ارادا باستالادى. دەمەۋشىلەردەن قاراجات جينالۋدا. دەگەنمەن، جىلجىمايتىن مۇلىكتىڭ بارلىق قۇجاتتارى ءتيىستى تالاپتارعا ساي بولۋى كەرەك» ، - دەپ اتاپ ءوتتى ايماق باسشىسى.

ب. ساپاربايەۆ اۋدان جانە اۋىل اكىمدەرىنىڭ ءتۇرلى مەملەكەتتىك باعدارلامالاردىڭ مۇمكىنشىلىكتەرىن ءتۇسىندىرۋ بويىنشا جۇمىستارىنىڭ السىزدىگىن نازار اۋداردى. ادامدار كوبىسى ولاردان حاباردار ەمەس. اكىمدەردىڭ ەڭ باستى مىندەتى - قاجەتتى اقپاراتتاردى تۇرعىندارعا جەتكىزۋ، ءبولىنىپ جاتقان قاراجاتتار ازاماتتاردىڭ تابىس دەڭگەيىن ارتتىرۋعا نەگىزدەلگەندىگىن تىلگە تيەك ەتتى ايماق باسشىسى. جامبىل وبلىسىنىڭ اكىمى قالپىنا كەلتىرۋ جۇمىستارىنان باستاپ، ءتارتىپ بۇزعاندارعا قاتىستى قىلمىستىق ىستەردى تەرگەۋ شارالارىنىڭ ءبارى زاڭ اياسىندا جۇرگىزىلەتىنىن ەسكە سالدى. «ءبىز قۇقىقتىق مەملەكەتتە تۇرامىز. ەگەر كىمدە- كىم زاڭدى بۇزسا، ۇلت پەن ءدىني نانىم - سەنىمىنە قاراماستان، بارلىعى زاڭ الدىندا جاۋاپ بەرەتىن بولادى» ، - دەپ تۇيىندەدى وبلىس اكىمى ءوز ءسوزىن. سونىمەن قاتار، وسى كۇنى بەردىبەك ساپاربايەۆ «قاراسۋ» باقىلاۋ- وتكىزۋ بەكەتىندە بولىپ، شەكارالىق جانە كەدەندىك قىزمەتتەردىڭ، سونداي- اق قىرعىزس رەسپۋبليكاسىنان كەلگەن ازاماتتاردى تەكسەرۋ ءىس- شارالارىن جۇرگىزەتىن مەديتسينا قىزمەتكەرلەرىنىڭ جۇمىسىمەن تانىستى.



باستى سوزدەر: ايماق,
:ءبولىسۋ
پئكئر قالدئرؤ
+7
جئبةرؤ
ونلاين قىزمەتكەرلەر
رەداكتور
باقىتجول كاكەش
باقىتجول كاكەش
954-049
رەداكتور
ريزابەك نۇسىپبەك
ريزابەك نۇسىپبەك
954-049
رەداكتور
بەيسەن سۇلتان
بەيسەن سۇلتان
954-049

مۇراعات