ەلوردادا تاعى ەكى نىسان كارانتينگە جابىلدى

نۇر- سۇلتان. قازاقپارات - ەلوردادا تاعى ەكى نىسان كارانتينگە جابىلدى، دەپ حابارلايدى قازاقپارات قالا اكىمدىگىنە سىلتەمە جاساپ.

ەلوردادا «مەيىرىم» مەديتسينالىق ورتالىعى مەن كەرەي، جانىبەك حاندار كوشەسىندە ورنالاسقان ۇلتتىق عىلىمي ونكولوگيالىق ورتالىعى كارانتينگە جابىلدى. بايلانىستا بولعان تۇلعالار كارانتينگە جىبەرىلدى، ونىڭ ىشىندە مەديتسينا قىزمەتكەرلەرى دە بار. دەزينفەكسيا جۇرگىزىلىپ جاتىر. ەمدەلۋشىلەرگە بارۋعا قاتاڭ تىيىم سالىنادى. ەستەرىڭىزگە سالا كەتەيىك، قالالىق شتاب بارلىق اۋەجولاۋشىلاردى تەكسەرۋ تۋرالى شەشىم قابىلدادى. نۇر- سۇلتان قالاسىنىڭ مەديتسينا قىزمەتكەرلەرى 22 - ناۋرىزدان باستاپ 20 دان استام رەيستى قابىلدادى، بۇل شامامەن 1750 ادام. 1,5 مىڭ ادام ساراپتاما ناتيجەسىن الدى. ءۇش جولاۋشىنىڭ ساراپتاما قورىتىندىسى وڭ ناتيجە كورسەتتى. بارلىق جولاۋشىلاردى تەكسەرۋ ينفەكسيانى جۇقتىرعان ادامداردىڭ قالاعا شىعۋىنا جول بەرمەۋگە جانە ولارعا ۋاقىتىلى مەديتسينالىق كومەك كورسەتۋگە مۇمكىندىك بەرىپ وتىر. قازاقستاندا 28 - ناۋرىزداعى دەرەكتەر بويىنشا كوروناۆيرۋستان ساۋىعىپ كەتكەندەردىڭ سانى 18 ادامدى قۇرايدى، ونىڭ 13 ءى— نۇر- سۇلتان قالاسىندا. ايتا كەتەيىك، بۇعان دەيىن قالادا №2 كوپسالالى وبلىستىق اۋرۋحانا جانە №1 اۆتوبۋس پاركى كارانتينگە جابىلعان بولاتىن.