16:29, 28 - ناۋرىز 2020 | GMT +6
قازاقستاندا شەتەلگە شىقپاعاندار اراسىندا كوروناۆيرۋس جۇقتىرعاندار سانى وسۋدە
نۇر- سۇلتان. قازاقپارات - ەلىمىزدە شەتەلگە شىقپاي- اق اۋرۋ جۇقتىرعاندار سانى وسۋدە. بۇل تۋرالى ق ر اقپارات جانە كوممۋنيكاتسيا ءمينيسترى داۋرەن ابايەۆ حابار 24 ارناسىندا وتكەن ونلاين بريفينگتە ايتتى.
«قازىر شەتەلگە شىقپاي- اق اۋرۋ جۇقتىرعاندار سانى وسۋدە. بۇل دەگەنىمىز - اۋرۋ قوناقتا، تۋىستاردىڭ ۇيىندە، ليفتتە، اۆتوبۋستا، ياعني كەز كەلگەن جەردە جۇعۋى مۇمكىن دەگەندى بىلدىرەدى. كوپ ادام بۇل ەسكەرتۋگە سالعىرت قارايتىنىن كورىپ وتىرمىز. مىسالى، كەشە - ءبىر كۇن ىشىندە عانا توتەنشە جاعداي تالاپتارىن بۇزعانى ءۇشىن 237 ادام جاۋاپقا تارتىلسا، ونىڭ 74 ءى قاماۋعا الىندى. بۇل بەيقامدىق اۋرۋحانادا ناۋقاستارعا ورىن جەتپەۋىنە اكەلۋى مۇمكىن. بۇعان جول بەرۋگە بولمايدى» ، - دەدى مينيستر.