الماتى وبلىسىندا كوروناۆيرۋس جۇقتىرعان ايەلدىڭ اياعى اۋىر

تالدىقورعان. قازاقپارات - الماتى وبلىسىندا كورونوۆيرۋس جۇقتىرعاندار تۋرالى اقپارات جاريالاندى، دەپ حابارلايدى قازاقپارات وبلىس اكىمىنىڭ باسپا ءسوز قىزمەتىنە سىلتەمە جاساپ.

«كوروناۆيرۋس ينفەكسياسىن جۇقتىرعان تاعى ەكى جاعداي وبلىستىڭ ەكى اۋدانىندا تىركەلدى. ءبىرىنشىسى - 1957 -جىلى تۋعان ايەل ىلە اۋدانىنىنداعى پروۆيزورلىق گوسپيتالدا كارانتيندە جاتقان بولاتىن. ول كوروناۆيرۋسپەن اۋىرعان اداممەن بايلانىستا بولعان. ايەل ادامنان اناليزدەر الىندى. تالداۋ قورىتىندىسى بويىنشا، ول قاراساي اۋداندىق ينفەكسيالىق اۋرۋحاناسىنا اۋىستىرىلدى. ەكىنشى جاعداي - جامبىل اۋدانىنىڭ تۇرعىنى، 1997 -جىلى تۋعان قىز بالا 20 - ناۋرىزدا وڭتۇستىك كورەيادان يە چوۋ- الماتى OZ 577 رەيسىمەن ۇشىپ كەلگەن. ال ءۇشىنشىسى - 1995 -جىلى تۋعان قاراساي اۋدانىنىڭ تۇرعىنى. ۆيرۋس انىقتالعان ازاماتشا جۇكتىلىكتىڭ 21-22 اپتاسىندا. سىرقاتتاردىڭ بارلىعى قاراساي اۋداندىق ينفەكسيالىق اۋرۋحاناسىندا ەم الۋدا» - دەلىنگەن حابارلامادا. ەسكە سالساق، الماتى وبلىسىندا كوروناۆيرۋستىڭ 4 جاعدايى تىركەلدى.