ونەر ادامدارى ونلاين كونسەرت بەرىپ، ءدارىس وتكىزۋدە

نۇر- سۇلتان. قازاقپارات - ادامزات بالاسىنىڭ باسىنا تونگەن ناۋبەت ءبىزدى دە اينالىپ وتپەدى. تاريحتا قانشاما جۇقپالى اۋرۋلار بولعان. عىلىم دامىماعان، تەحنيكا بولماعان زاماننىڭ وزىندە ساقتىق شارالارىن جاساعاندار امان قالعان.

اماندىقتىڭ جالعىز جولى - ۇيدەن شىقپاۋ. الدىڭعى شەپتەگى قىزمەتكەرلەر بولماسا، باسقاسى ونلاين جۇمىسقا كوشتى. ۇستازدار دا. ال ونەر سالاسىنداعى ۇستازدىڭ باستى قارۋى - ءانى، كۇيى، جىرى. تاريحتا اۋىرىپ نە قايعىدان بۇك ءتۇسىپ جاتىپ قالعانداردى «انمەن، كۇيمەن ەمدەپتى» دەگەن مىسال كوپ. سول ءداستۇردى جاڭعىرتىپ، ونەر يەلەرى قوڭىر ءۇندى دومبىرا مەن كونە قوبىز سارىنىمەن حالىقتىڭ الاڭداۋلى كوڭىلىن باسپاققا كىرىستى. مادەنيەت جانە سپورت مينيسترلىگىنە قاراستى قۇرمانعازى اتىنداعى قازاق ۇلتتىق كونسەرۆاتورياسىنىڭ ۇستازدارى ۇيدەن شىقپاي، ءبىرى - كونسەرت ، ءبىرى - شەبەرلىك ءدارىسىن بەرۋدى باستادى. ونەرپازداردىڭ Facebook جەلىسىندەگى جەكە پاراقشالارىندا #CNERONLINE حەشتەگىمەن باستالعان ءداستۇر توتەنشە جاعداي اياقتالعانشا جالعاسپاق. قۇرمانعازى اتىنداعى قازاق ۇلتتىق كونسەرۆاتورياسىنىڭ اعا وقىتۋشىسى ماقسات مەدەۋبەك 25 -ناۋرىزدا «قوبىز - قورقىتتان قالعان اڭىز» ، 26 - ناۋرىزدا باۋىرجان بەكمۇحانبەتتىڭ «جەتىسۋدىڭ وڭتۇستىك شىعىسىنداعى كۇيشىلىك ءداستۇرى» اتتى لەكسيا- كونسەرت بەردى. بۇگىن 27 - ناۋرىزدا «حالىق مۋزىكاسى» فاكۋلتەتىنىڭ دەكانى، PhD دوكتورى ەرجان جامەڭكەيەۆتىڭ «قازاقتىڭ دومبىراداعى ءازىل كۇيلەرى» تاقىرىبىنداعى ءدارىسى تىكەلەي ەفيردە ءوتتى.