الماتىدا كىمدەرگە الەۋمەتتىك تولەم بەرىلەدى

الماتى. قازاقپارات - الماتىدا توتەنشە جاعداي رەجىمى ەنگىزىلگەن كەزدەن باستاپ تابىس كوزىنەن ايىرىلعان ازاماتتارعا الەۋمەتتىك تولەم جاساۋ ءۇشىن قۇجات قابىلداۋ باستالدى، دەپ حابارلايدى قازاقپارات ءتىلشىسى.

بۇگىن قالالىق الەۋمەتتىك ءال- اۋقات باسقارماسى باسشىسىنىڭ ورىنباسارى اينۇر مۇقاجانوۆا ونلاين بريفينگ بارىسىندا الەۋمەتتىك تولەمدەر مەملەكەتتىك الەۋمەتتىك ساقتاندىرۋ قورىنان تولەنەتىنىن ايتتى. بۇل قاراجاتتى ماكرو جانە ميكرو، شاعىن جانە ورتا بيزنەس سۋبەكتىلەرى، جەكە كاسىپكەرلەر، جەكە كەڭسەسى بار نوتاريۋستار، سوت ورىنداۋشىلارى، كاسىبي مەدياتورلار، قورعاۋشىلار، ءبىرىڭعاي جيناق تولەمىن تولەپ جۇرگەن ازاماتتار الا الادى.

«جۇمىس بەرۋشى ءوزى ەلەكتروندى ۇكىمەت پورتالىنا قاجەتتى قۇجاتتاردى ءوزى راسىمدەۋى كەرەك. ول ءوتىنىش، جۇمىس بەرۋشىنىڭ ت ج كەزىندە جۇمىس توقتاتقانى تۋرالى حابارلاما، بارلىق جۇمىسشىلارعا شىعارىلعان بۇيرىقتاردى كورسەتۋى شارت» ، - دەدى ول. جۇمىس بەرۋشىنىڭ ارىزى جۇمىسپەن قامتۋ ماسەلەلەرى بويىنشا اۋداندىق شتابتاردا قارالاتىن بولادى. الماتىدا ءار 8 اۋداندا وسىنداي شتاب قۇرىلعان.

«قۇجاتتار ەلەكتروندى قۇجات اينالىمى ارقىلى مەملەكەتتىك كورپوراتسياعا بەرىلەتىن بولادى. مەملەكەتتىك كورپوراتسيا مەن الەۋمەتتىك ساقتاندىرۋ مەملەكەتتىك قورىنىڭ بولىمشەلەرى 4 جۇمىس كۇنى ىشىندە اقپاراتتى تەكسەرەتىن بولادى. ءار قىزمەتكەرگە قاتىستى شەشىم شىعارىپ، 2 كۇندە ءتىزىم جاسايدى. قور قىزمەتكەرلەرىنىڭ شەشىمى تەلەفونعا حات جولداۋ ارقىلى حابارلانادى» ، - دەدى اينۇر مۇقاجانوۆا.