نەسيە تولەمىن كەيىنگە شەگەرۋ مۇمكىندىگى كىمدەرگە بەرىلەدى
قازىرگى ۋاقىتتا قارجى نارىعىن رەتتەۋ جانە دامىتۋ اگەنتتىگى، قازاقستان قارجىگەرلەرىنىڭ قاۋىمداستىعى، ەكىنشى دەڭگەيلى بانكتەر مەن ميكروقارجى ۇيىمدارى حالىقتى قولداۋ بويىنشا ءتيىستى شارالاردى ازىرلەپ، بەكىتتى.
«وسىلايشا، قارىز الۋشىلار ءۇشىن تولەم مەرزىمى 2020 -جىلدىڭ 16 - ناۋرىزى مەن 15 - ماۋسىمى ارالىعىندا كەيىنگە شەگەرىلەدى. قارىز بويىنشا تولەمدەردى كەيىنگە شەگەرۋ مۇمكىندىگى وسىعان مۇقتاج ادامدارعا بەرىلمەك. ماسەلەن، كارانتيننىڭ ەنگىزىلۋى سەبەپتى جۇمىسىنان ايرىلعاندار، اقى تولەنبەيتىن ەڭبەك دەمالىسىنا شىققاندار، جالاقىسى قىسقارعاندار نەمەسە توقتاتىلعاندار جانە ت. ب. وزدەرىڭىز تۇسىنگەندەي، نەگىزدەمەلەردىڭ باسىم كوپشىلىگى توتەنشە جاعداي رەجيمىنە قاتىستى بولماق»، - دەدى مينيستر «حابار 24» تەلەارناسىنىڭ تىكەلەي ەفيرىندە.
قوسىمشا قۇجاتتارسىز بۇل شەگەرۋ شاراسى رەسمي تۇردە تىركەلگەن جۇمىسسىزدارعا، ا ءا ك الۋشىلار جانە حالىقتىڭ الەۋمەتتىك ءالجۋاز توپتارىنا قاتىستى قولدانىلادى. سونىمەن بىرگە، نەسيەلىك ۇيىمدار اتالعان تۇلعالاردىڭ تىزىمدەرىن كرەديتتىك بيۋرولاردان الادى. بۇل شارا كاسىپكەرلەرگە دە قاتىستى بولادى. مىسالى، تاۋار ساتىلىمى مەن كورسەتىلەتىن قىزمەت كولەمى ازايۋى سەبەپتى قارجىلىق جاعدايى ناشارلاعان، تۇتىنۋشىلار تولەمى كەشىككەن جانە ت. ب. سەبەپتەرمەن كاسىپكەرلەر تولەمدەرىن كەيىنگە شەگەرۋ مۇمكىندىگىن الا الادى.
ەسكە سالا كەتسەك، قازىرگى ۋاقىتتا كوروناۆيرۋس ينفەكتسياسىمەن نۇر- سۇلتان قالاسى بويىنشا 60 ادام، الماتى قالاسىندا - 48 ادام، قاراعاندى قالاسىندا – 4، جامبىل وبلىسىندا -3 ادام، اتىراۋ وبلىسى - 3 ادام، شىمكەنت قالاسىندا - 2 ادام، الماتى وبلىسىندا - 1 ادام، اقتوبە وبلىسىندا - 1 ادام، سولتۇستىك قازاقستان وبلىسىندا - 1 ادام، اقمولا وبلىسىندا - 1 ادام، پاۆلودار وبلىسىندا - 1 ادام، جالپى 125 ناۋقاس تىركەلدى.
سونىمەن بىرگە، داۋرەن ابايەۆ كارانتين رەجيمى كۇشەيتىلگەن كەزدەگى كوشەدە ءجۇرۋ تالاپتارىن تۇسىندىرگەن ەدى. كوروناۆيرۋستان قايتىس بولعانداردى جەرلەۋ تۋرالى باس سانيتارلىق دارىگەردىڭ قاۋلىسى شىعادى.
اۆتور: ايجان سەرىكجان قىزى