ءبىلىم ءمينيسترى: بەينەساباقتار قازاق جانە ورىس تىلدەرىندە جازىلۋدا

None
None
نۇر- سۇلتان. قازاقپارات – ق ر ءبىلىم جانە عىلىم ءمينيسترى اسحات ايماعامبەتوۆ ۋاقىتشا قاشىقتان وقىتۋعا كوشۋ شەشىمىنە بايلانىستى پىكىر ءبىلدىردى، دەپ حابارلايدى قازاقپارات ءتىلشىسى.

«سوڭعى ۋاقىتتا مەكتەپتەردە وقۋ پروتسەسى قالاي ۇيىمداستىرىلاتىنى تۋرالى كوپتەگەن سۇراقتار كەلىپ تۇسۋدە، ويتكەنى ءتورتىنشى توقساننىڭ باستالۋىنا نەبارى ون كۇن قالدى. ادامداردىڭ بويىندا، اسىرەسە، وسىنداي قيىن كەزەڭدە، جاڭا ءارى بەلگىسىز نارسەگە دەگەن قورقىنىش سەزىمىنىڭ بولۋى - قالىپتى جاعداي. فورس- ماجورلىق جاعدايدا ءبىلىم بەرۋ سالاسىندا بولىپ جاتقان پروتسەستەر بىزگە تەك پايداسىن تيگىزەدى دەپ سەندىرگىم كەلەدى. ءبىز سىني پىكىرلەردى ەستىپ تە، كورىپ تە وتىرمىز. دەگەنمەن، قاشىقتان ءبىلىم بەرۋگە كوشۋ - كوروناۆيرۋستىق ينفەكتسيانىڭ تارالۋىن ازايتۋعا باعىتتالعان شارالار اياسىندا جۇزەگە اسىپ جاتقانىن بارلىعى تۇسىنگەنى ءجون. وكىنىشكە قاراي، باسقا تاڭداۋ جوق. وقۋ پروتسەسى توقتاتىلماۋى ءتيىس»، - دەپ جازدى مينيستر الەۋمەتتىك جەلىدەگى پاراقشاسىندا.

وسى ورايدا ا. ايماعامبەتوۆ مينيسترلىك وسىنداي جاعدايعا تاپ بولعان باسقا ەلدەردىڭ تاجىريبەسىن الدىن الا زەردەلەگەنىن اتاپ ءوتتى. ءىس جۇزىندە ولاردىڭ بارلىعى قاشىقتان وقۋ رەجىمىنە كوشكەن، ياعني بۇكىل الەم بويىنشا 870 ميلليوننان استام وقۋشى وسىنداي فورماتتا ءبىلىم الۋدا.

«بارلىق مۇمكىندىكتەردى، اسپەكتىلەر مەن تاۋەكەلدەردى جان- جاقتى وي ەلەگىنەن وتكىزە وتىرىپ، ءبىز دە ۋاقىتشا قاشىقتان وقىتۋعا كوشۋ تۋرالى شەشىم قابىلدادىق. بىرىنشىدەن، تەلەديدار ارقىلى ساباق وتكىزۋ. بۇل - تىپتەن جاڭا فورمات. «بالاپان» جانە «ەل ارنا» تەلەارنالارى بىزگە وزدەرىنىڭ ەفيرلىك ۋاقىتىن ۇسىندى. ءتۇسىرىلىم جۇمىستارى باستالىپ كەتتى. نەگىزگى پاندەر بويىنشا 2000-نان استام بەينەساباق ءتۇسىرۋ قاجەت. مەن كەشە ءتۇسىرىلىم جۇمىستارى جۇرگىزىلىپ جاتقان ستۋديادا بولدىم. سسەناري جازۋشىلاردان، رەجيسسەرلەر مەن پەداگوگتەردەن تۇراتىن جۇمىس توبى ءاربىر شىعارىلىمدى مۇقيات پىسىقتاۋدا. ءبىزدىڭ ۇستازدار تەلەجۇرگىزۋشى رەتىندەگى مۇلدەم جاڭا ءرولدى مەڭگەرۋدە. بەينەساباقتار قازاق جانە ورىس تىلدەرىندە جازىلۋدا. بۇل وڭاي ءىس ەمەس ەكەنىن بىردەن ايتقىم كەلەدى»، - دەدى ۆەدومستۆو باسشىسى.

ەكىنشىدەن، ارنايى مامانداندىرىلعان ينتەرنەت- پلاتفورمالارى ارقىلى ساباقتار وتكىزۋ قاراستىرىلعان. بۇل سيفرلىق جۇيەلەر وقۋشىلارعا وتكەن ساباقتى نەمەسە بۇرىن تالقىلانعان تاقىرىپتى قايتا قاراۋعا، سونداي- اق ونلاين- ساباق وتكىزۋگە، كەرى بايلانىس ورناتۋعا، جەكە دارا وقىتۋ مەن تاپسىرمالاردى گەيميفيكاتسيالاۋعا زور مۇمكىندىك بەرەدى.

«سونىمەن قاتار، بۇل فورمات تەستىلەۋ جۇمىستارىن وتكىزۋگە جانە العان بىلىمدەرىن باعالاۋعا مۇمكىندىك جاسايدى. بۇرىن مۇنداي كومپانيالاردىڭ ءبىلىم بەرۋ كونتەنتىنە قول جەتكىزۋ اقىلى بولسا، وسى كەزەڭدە ءبىزدىڭ بالالار بارلىق كەرەك اقپاراتتى جانە پلاتفورمالاردى تەگىن پايدالانا الادى. ءتيىستى كەلىسىمگە قول جەتكىزدىك. سونداي- اق، ءبىز ينتەرنەت- پروۆايدەرلەرىمەن وسى رەسۋرستاردى پايدالانعان كەزدە ترافيك ەسەپتەلمەيتىندەي كەلىسىم ورناتتىق»، - دەپ ناقتىلادى اسحات ايماعامبەتوۆ.

اۆتور: رۋسلان عابباسوۆ

سوڭعى جاڭالىقتار