دەزينفەكسيالىق قۇرالدار ادام اعزاسىنا قاۋىپسىز - ماماندار

الماتى. قازاقپارات - ماماندار الماتى اۋلالارىن دەزينفەكسيالاۋعا ارنالعان قۇرالداردىڭ ادام اعزاسىنا قاۋىپسىزدىگىن ايتتى، دەپ حابارلايدى قازاقپارات ءتىلشىسى.

«الماتى قالاسى بويىنشا دەزينفەكسيالاۋ ورتالىعى» ر م ك بولىمشەسىنىڭ اقپاراتىنا سايكەس، زاماناۋي دەزينفەكسيالىق قۇرالدار 4-ساناتتاعى قۇرالدارعا جاتادى. ياعني، ادام اعزاسىنا قاۋىپتىلىگى تومەن بولعاندىقتان، ادام اعزاسىنا، جانۋارلاردىڭ اعزاسىنا زيان كەلتىرمەيدى. ارنايى ەرىتىندى مامانداردىڭ ينسترۋكسياسىنا سايكەس ازىرلەنەدى. اۋلالاردى زارارسىزداندىرۋعا مەملەكەتتىك رەەسترگە كىرەتىن كەدەن وداعى نەمەسە قازاقستان تەرريتورياسىنا قولدانۋعا رۇقسات ەتىلگەن قۇرالدار قولدانىلادى. تروتۋارلاردى، ايالداما كەشەندەرىن، قوقىس جاشىكتەرىن، بانكوماتتاردى دەزينفەكسيالاۋ ءۇشىن ق ر قورعانىس مينيسترلىگىنىڭ اسكەري دەزوتريادتارى بەلسەندى حلور بويىنشا % 0,015 كونسەنتراتسياداعى ناتري گيپوحلوريدىن پايدالانادى. الماتى قالالىق دەزينفەكسيا ورتالىعىنىڭ دەزينفەكسيالىق بريگادالارى ناۋقاستىڭ ءۇي وشاقتارىندا جانە ەمدەلىپ شىققانداردىڭ جاتقان اۋرۋحانالارىنداعى وبسەرۆاتسيالىق بولىمشەلەرى مەن مەديتسينالىق ورتالىقتارىنا وڭدەۋ جۇرگىزەدى. قالالىق جاسىل ەكونوميكا باسقارماسىنىڭ مالىمدەۋىنشە، قالادا قازىر كوشەلەر، جاياۋ جۇرگىنشىلەرگە ارنالعان جولدار، جالپى پايدالانىلۋعا ارنالعان ورىنداردىڭ بارلىعىنا دەزينفەكسيا جۇمىستارى جۇرگىزىلۋدە.

بۇل جۇمىستار ءۇشىن 91 سۋ شاشاتىن ماشينا، 36 جاياۋ جۇرگىنشىلەرگە ارنالعان جولداردى سىپىراتىن ماشينا جانە 886 جۇمىسشى تارتىلىپ وتىر. قالا كوشەلەرى بويىنداعى قوقىس سالاتىن ۋرنالار، ورىندىقتار، قوعامدىق كولىك ايالدامالارى، جەراستى جانە جەرۇستى جولدارىن دەزەنفەكتسيالاۋ جۇمىسىنا 121 ادام جۇمىلدىرىلدى. سونىمەن قاتار، كونتەينەرلەر مەن كونتەينەرلەردىڭ اۋماعىن دەزينفەكسيالاۋ جۇمىستارى دا جۇيەلى جالعاسىپ، ونىڭ جۇمىسىنا 85 ادام جۇمىلدىرىلدى. كەشە 307 كونتەينەر الاڭى مەن 1466 كونتەينەرگە دەزينفەكسيا جۇمىستارى جۇرگىزىلدى. قالا پوليگونىنا 1310 توننا قوقىس جونەلتىلدى.

ايتا كەتۋ كەرەك، مۇنىڭ الدىندا وقىرماندار ورتالىق ساياباقتا زارارسىزداندىرۋ جۇمىستارىنان سوڭ كەپتەرلەر قىرىلىپ جاتقانىن ايتىپ شاعىمدانعان بولاتىن. ق ر ەكولوگيا، گەولوگيا جانە تابيعي رەسۋرستار مينيسترلىگىنىڭ ورمان شارۋاشىلىعى جانە جانۋارلار الەمى كوميتەتىنىڭ باسپا ءسوز حاتشىسى ساكەن دىلداحمەت كوميسسيانىڭ جۇرگىزگەن ساراپتاماسىنا سايكەس كەپتەرلەر ولگەن جەردە مۇنىڭ الدىندا اۋماعى 100 شارشى مەتر مۇز ايدىنى بولعانىن ايتتى. سول جەردە بارلىعى 30 كەپتەر ولگەن.

«قۇستار ۋلانعان بولۋى مۇمكىن. كوميسسيا مۇشەلەرى كەپتەرلەردىڭ دەنەسىن زەرتحانالىق زەرتتەۋ جۇرگىزۋ ءۇشىن الدى. قۇستاردىڭ ولىمىنە نە ىقپال ەتكەنى زەرتتەۋلەردەن سوڭ بەلگىلى بولادى»، - دەدى س. دىلداحمەت.