قاراعاندى وبلىسىندا مۇز استىنا ءتۇسىپ كەتكەن اۆتوكولىكتە بولعان ەكى ەر ادام كوز جۇمدى

قاراعاندى. قازاقپارات - قاراعاندى وبلىسىنداعى سۋ ايدىندارىنىڭ بىرىندە ىشىندە ءتورت ادامى بار جەڭىل كولىك مۇز استىنا باتىپ كەتتى. وقيعا سالدارىنان ەكى ادام كوز جۇمدى، دەپ حابارلايدى قازاقپارات ءتىلشىسى.

26 -ناۋرىز كۇنى ساعات 21:20-دا مۇز استىنا اۆتوكولىك قۇلاپ كەتتى. جەڭىل كولىكتىڭ ىشىندە 4 ادام بولعان. وقيعا قاراعاندى وبلىسى وساكاروۆ اۋدانى مولودەجنىي كەنتىنەن 40 شاقىرىم جەردە ورىن الدى.

«ەكى ەر ادام مۇز استىنان شىعىپ ۇلگەرگەن. كولىكتە بولعان تاعى ەكى ادامدى ت ج د بولىمشەلەرىنىڭ كۇشىمەن ىزدەستىرۋ جۇرگىزىلدى. 27 - ناۋرىزدا ساعات 10:51-دە 1985 جانە 1982 -جىلى تۋعان ەر ادامداردىڭ ءمايىتى تابىلدى جانە سۋدان شىعارىلدى»، - دەپ حابارلادى قاراعاندى وبلىسى ت ج د باسپا ءسوز قىزمەتى.

كوكتەمگى مۇزدىڭ قاۋىپتىلىگىن ءتۇسىندىرۋ ماقساتىندا ت ج د قىزمەتكەرلەرى جەرگىلىكتى پوليتسيا قىزمەتىمەن بىرلەسىپ سۋ ايدىندارىندا الدىن الۋ رەيدتەرىن جۇرگىزەدى. ۇگىت- ناسيحات جۇمىستارى بارىسىندا بالىقشىلارعا مۇزداعى قاۋىپسىزدىك شارالارى ءتۇسىندىرىلدى. بارلىعى 200 رەيد جانە 600 پاترۋلدىك باقىلاۋ وتكىزىلدى. سونداي- اق، قۇتقارۋشىلار تۇرعىنداردان كوكتەمگى كەزەڭدە سۋ ايدىندارىنداعى قاۋىپسىزدىك ەرەجەلەرىن ساقتاۋدى سۇرايدى. بارلىق وقيعالار مەن ت ج تۋرالى 112 تەلەفوندارىنا حابارلاۋعا بولادى.

اۆتور: اگاتا مۋحامەدجانوۆا