كوروناۆيرۋستان كوز جۇمعان ايەل تۇرعان ءۇي دەزينفەكسيالانادى - سەرىك ومارحانوۆ
بۇل تۋرالى تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتى باسشىسىنىڭ ورىنباسارى سەرىك ومارحانوۆ ايتتى، دەپ حابارلايدى قازاقپارات ءتىلشىسى.
«ناۋقاسپەن جاقىن ارالاسقان ادامدار انىقتالدى. ولار وتباسى مۇشەلەرى جانە ناۋقاس جاتقان №2 -كوپسالالى وبلىستىق اۋرۋحانا. ونىمەن بايلانىستا بولعان ادامدار اۋرۋحاناعا جاتقىزىلىپ، زەرتحانادا تەكسەرۋدەن ءوتتى. ولار مەديتسينالىق باقىلاۋدا بولادى»، - دەيدى سەرىك ومارحانوۆ حابار 24 تەلەارناسىندا وتكەن ونلاين بريفينگتە.
جەرلەۋ ءراسىمى وتكەننەن كەيىن مارقۇم ايەل تۇرعان ءۇي دەزينفەكسيالانادى.
«قازىرگى ۋاقىتتا ەپيدەمياعا قارسى شارالار جۇزەگە اسۋدا. جەرلەۋ ءراسىمى وتكەننەن كەيىن قايتىس بولعان ايەل تۇرعان ۇيگە تولىق ديزەنفەكسيا جاسالادى. ديزەنفەكسيانى نۇر-سۇلتان قالاسىنىڭ ۇلتتىق ساراپتاما ورتالىعى جۇرگىزەدى»، - دەيدى ول.
ەسكە سالا كەتسەك، بۇعان دەيىن قازاقستاندا كوروناۆيرۋس ينفەكسياسىنان ءبىر ايەل قايتىس بولعانى تۋرالى جازدىق.
اۆتور: زارينا قاھارمان