الەمدە كوروناۆيرۋس جۇقتىرعاندار سانى جارتى ميلليوننان استى

نۇر-سۇلتان. قازاقپارات - الەمدە كوروناۆيرۋس ىندەتىن جۇقتىرۋ جاعدايلارى 530 مىڭنان اسىپ جىعىلدى، دەپ حابارلايدى قازاقپارات.

«27-ناۋرىز تاڭىنداعى جاعداي بويىنشا، الەمدە ينفەكسياعا 534506 ادام شالدىقتى. ءبىر تاۋلىك ىشىندە ولاردىڭ سانى 59419 كوبەيدى. 24187 ادام قايتىس بولدى، ءبىر تاۋلىك ىشىندە - 2787. جازىلىپ شىققاندار سانى 119951، ءبىر تاۋلىك ىشىندە - 9293»، - دەلىنگەن ق ر دەنساۋلىق ساقتاۋ مينيسترلىگى تاۋارلار مەن كورسەتىلەتىن قىزمەتتەردىڭ ساپاسىن جانە قاۋىپسىزدىگىن باقىلاۋ كوميتەتىنىڭ مالىمەتىندە.

ايتا كەتەيىك، 27-ناۋرىز، ساعات 07.50 دەگى جاعداي بويىنشا، قازاقستاندا ىندەتكە 120 ادام شالدىقتى: نۇر-سۇلتان قالاسىندا - 60 ادام، الماتى قالاسىندا - 47، قاراعاندى وبلىسىندا - 4، شىمكەنت قالاسىندا - 2، الماتى وبلىسىندا - 1، اقتوبە وبلىسىندا - 1، جامبىل وبلىسىندا - 3، سولتۇستىك قازاقستان وبلىسىندا - 1، اقمولا وبلىسىندا - 1 ادام.