كوروناۆيرۋسپەن كۇرەس: نۇر-سۇلتان قالاسىنىڭ جەدەل شتابىنىڭ شەشىمى جاريالاندى
«نۇر-سۇلتان قالاسىنىڭ اۋماعىندا كوروناۆيرۋستىق ينفەكتسيانىڭ (COVID-19) تارالۋىنا جول بەرمەۋ جونىندەگى قوسىمشا شارالار تۋرالى» «ازاماتتىق قورعاۋ تۋرالى» 2014-جىلعى 11- ساۋىردەگى قازاقستان رەسپۋبليكاسىنىڭ زاڭىنا، «قازاقستان رەسپۋبليكاسىندا توتەنشە جاعدايدى ەنگىزۋ تۋرالى» قازاقستان رەسپۋبليكاسى پرەزيدەنتىنىڭ 2020-جىلعى 15- ناۋرىزداعى 285№ جارلىعىنا سايكەس ازاماتتاردىڭ ءومىرى مەن دەنساۋلىعىن قورعاۋ، كوروناۆيرۋستىق ينفەكتسيانىڭ (COVID-19) تارالۋىنا جول بەرمەۋ ماقساتىندا نۇر-سۇلتان قالاسىنىڭ اۋماعىندا كارانتين جانە توتەنشە جاعدايدىڭ قولدانىلۋ كەزەڭىندە نۇر-سۇلتان قالاسىندا كوروناۆيرۋستىق ينفەكتسيانىڭ انىقتالۋ جاعدايلارىنىڭ كوبەيۋىنە بايلانىستى نۇر-سۇلتان قالاسى بويىنشا كوروناۆيرۋستىق ينفەكتسيانىڭ تارالۋىنا جول بەرمەۋ جونىندەگى جەدەل شتاب، توتەنشە جاعدايدى جويۋ باسشىسى بىلاي دەپ شەشتى:
2020-جىلعى 28- ناۋرىزدا ساعات 00.00 باستاپ:
ازىق-تۇلىك، ءدارى-دارمەكتەر ساتىپ الۋ مەن جۇمىسقا شىعۋدى قوسپاعاندا، ازاماتتاردىڭ تۇرعىن ۇيدەن شىعۋى شەكتەلسىن؛
حالىقتىڭ جاپپاي جينالاتىن ورىندارى (ساياباقتار، شاعىن باقتار، جاياۋ جۇرەتىن كوشەلەر، جاعالاۋلار، ويىن الاڭدارى جانە ت. ب.) جابىلسىن؛
قوعامدىق كولىكتىڭ جۇمىسى كەزەڭ-كەزەڭمەن شەكتەلسىن؛
كوشەلەردە جانە وزگە دە قوعامدىق جەرلەردە ءۇش ادامنان ارتىق توپتارمەن (وتباسى مۇشەلەرىن قوسپاعاندا) جينالۋعا تىيىم سالىنسىن؛
كامەلەتكە تولماعانداردى ەرەسەك ادامداردىڭ ەرىپ ءجۇرۋىنسىز قوزعالۋىنا تىيىم سالىنسىن.
نۇر-سۇلتان قالاسىنىڭ پوليتسيا دەپارتامەنتى:
جوعارىدا كورسەتىلگەن تالاپتاردى بۇزۋ نە ورىنداماۋدى انىقتاعان جاعدايدا ءتيىستى اكىمشىلىك شارالاردى دەرەۋ قابىلداسىن؛
ازاماتتاردىڭ قوعامدىق ورىنداردا، ساياباقتاردا، شاعىن باقتاردا جانە ت. س. س. بولۋىنا جول بەرمەۋ ماقساتىندا ەنگىزىلگەن شەكتەۋلەردى ساقتاۋ بويىنشا پاترۋلدەۋ ۇيىمداستىرىلسىن؛
كارانتين ايماعىن تولىق قورشاۋدى، قالاعا كىرۋ مۇمكىندىگىن بولدىرماۋدى قامتاماسىز ەتسىن.
«نۇر-سۇلتان قالاسىنىڭ ىشكى ساياسات باسقارماسى» مەملەكەتتىك مەكەمەسى استانا تۇرعىندارى اراسىندا جۇقتىرۋ وشاقتارىن وقشاۋلاۋدى جانە ونىڭ تارالۋ قاۋىپتەرىن مەيلىنشە ازايتۋدى قامتاماسىز ەتۋگە ارنالعان شەكتەۋ جانە الەۋمەتتىك وقشاۋلاۋ بويىنشا قابىلداناتىن شارالاردى بۇقارالىق اقپارات قۇرالدارىندا اقپاراتتىق سۇيەمەلدەۋدى، ادام مەن ازاماتتىڭ، قوعام مەن مەملەكەتتىڭ قاۋىپسىزدىگىن قامتاماسىز ەتۋگە باعىتتالعان شەشىمدەردىڭ ماڭىزدىلىعىن اشىپ كورسەتۋدى جۇرگىزسىن.
وسى شەشىمنىڭ ورىندالۋىن باقىلاۋدى وزىمە قالدىرامىن. وسى شەشىم وعان قول قويىلعان كۇننەن باستاپ قولدانىسقا ەنگىزىلەدى.