ا ق ش- تا كوروناۆيرۋسقا شالدىققاندار سانى قىتايدان اسىپ ءتۇستى

ۆاشينگتون. قازاقپارات - ا ق ش كوروناۆيرۋس جۇقتىرعان ادامداردىڭ سانى بويىنشا قىتايدان وزدى.

بەيسەنبى كۇنگى مالىمەتتەر بويىنشا، ا ق ش- تا ىندەتكە شالدىعۋدىڭ 82040 جاعدايى تىركەلدى.

قىتايدا ناۋقاستانعانداردىڭ جالپى سانى 81782 بولعان ەدى، دەپ حابارلايدى قازاقپارات BBC اگەنتتىگىنە سىلتەمە جاساپ.

ا ق ش پرەزيدەنتى دونالد ترامپتىڭ ايتۋىنشا، ەلدىڭ كوروناۆيرۋس جۇقتىرۋ وقيعالارى بويىنشا ءبىرىنشى ورىنعا شىعۋى ادامدارعا تەستىلەۋدىڭ جاپپاي وتكىزىلۋىمەن بايلانىستى. نيۋ-يوركتىڭ وزىندە عانا اۋرۋ جۇقتىرعان 30 مىڭنان استام ادام بار. بۇدان ناشار ستاتيستيكا تەك يتاليادا عانا.

ىندەت جۇقتىرۋ وقيعالارى امەريكانىڭ بارلىق 50 شتاتىندا تىركەلگەن، ودان كوز جۇمعاندار سانى 1000 ادامعا جەتتى.

بۇعان دەيىن ا ق ش سەناتى ەل ەكونوميكاسىن قولداۋ ءۇشىن ەكى تريلليون دوللار ءبولۋ تۋرالى زاڭ جوباسىن قابىلداعان. بۇل امەريكا تاريحىندا ۇكىمەت كورسەتىپ وتىرعان ەڭ كولەمدى پاكەت - ا ق ش- تىڭ ءاربىر ەرەسەك تۇرعىنى 1200 دوللار كولەمىندە ءبىرجولعى كومەك الاتىنى شامالانعان. بۇدان بولەك، شاعىن كومپانيالارعا جالاقى تولەۋدى قامتاماسىز ەتۋگە مۇمكىندىك بەرەتىن قارجىلىق دەمەۋ كورسەتۋ قاراستىرىلعان.

ا ق ش- تا كوروناۆيرۋس ىندەتى ورشىگەننەن كەيىن جۇمىسسىز ادامداردىڭ سانى ارتىپ، رەكوردتى 3,3 ميلليونعا جەتتى.