كوروناۆيرۋس جۇقتىرعان جامبىلدىق وتباسىمەن بىرگە قىرعىز شەكاراسىن اسىپ كەلگەن

نۇر-سۇلتان. قازاقپارات - جامبىل وبلىسىندا كوروناۆيرۋسقا قاتىستى سوڭعى تىركەلگەن وقيعانىڭ ءمان-جايى بەلگىلى بولدى، دەپ حابارلايدى قازاقپارات coronavirus2020.kz سىلتەمە جاساپ.

26- ناۋرىزدا جامبىل وبلىسىندا قورداي اۋدانىنىڭ 1974-جىلعى تۇرعىنىنان كوروناۆيرۋس ينفەكتسياسى تابىلدى.

ول ءبىر كۇن بۇرىن وتباسىمەن بىرگە قىرعىزستاننان كەلگەن. بەلگىلەنگەن الگوريتمگە سايكەس ۇيلەستىرىلگەن ءىس-قيمىل ناتيجەسىندە بەس مۇشەسى بار اتالمىش وتباسى شەكارادان وتە سالىسىمەن وقشاۋلانىپ، كارانتين ستاتسيونارىنا جاتقىزىلعان.

زەرتحانا تالداۋى ءبىر ادامدا ۆيرۋس بار ەكەنىن كورسەتتى، وتباسىنىڭ باسقا مۇشەلەرىنىڭ تالداۋى تەرىس ناتيجە كورسەتتى.

ناۋقاس ينفەكتسيالىق ستاتسيونارعا اۋىستىرىلدى، قالعاندارى كارانتين ستاتسيونارىندا مەديتسينالىق باقىلاۋدا قالا بەرەدى.

ولارمەن بايلانىستا بولعان ادامدار انىقتالدى، قازىر قاجەتتى ەپيدەمياعا قارسى شارالار جاسالىپ جاتىر.