ەلوردادا پوليتسەيلەر داۋىس كۇشەيتكىش قۇرالدار ارقىلى حابارلاما جاسايدى

نۇر- سۇلتان. قازاقپارات - ەلوردالىق پوليتسيا قىزمەتكەرلەرى داۋىس زورايتقىش قۇرالدار ارقىلى تۇرعىندارعا كارانتيندىك ساقتىق شارالارى تۋرالى ەسكەرتەدى، دەپ حابارلايدى قازاقپارات قالالىق پوليتسيا دەپارتامەنتىنە سىلتەمە جاساپ.

ىشكى ىستەر ورگاندارىنىڭ قىزمەتكەرلەرى ەلىمىزدەگى توتەنشە جاعداي مەن قالاداعى كارانتينگە بايلانىستى ايرىقشا رەجيمدە قىزمەت ەتۋدە. قوعامدىق ءتارتىپ پەن ستراتەگيالىق نىسانداردى قورعاۋدى كۇشەيتىپ، پوليتسيا جاساقتارىنىڭ سانى كوبەيتىلدى. سونىمەن بىرگە، كوشەلەردى پاترۋلدەۋ جۇمىستارى جالعاسۋدا. پوليتسيا كولىكتەرى داۋىس زورايتقىشتارىمەن جابدىقتالعان جانە ولاردى حالىق اراسىندا ءتۇسىندىرۋ جۇمىستارىن جۇرگىزۋ ءۇشىن پايدالانۋ تۋرالى شەشىم قابىلداندى. قازاق جانە ورىس تىلدەرىندە قايتالاناتىن اۋديوجازبالاردا تومەندەگىدەي اقپارات ايتىلادى:

«قۇرمەتتى ەلوردا تۇرعىندارى! نۇر- سۇلتان قالاسى اۋماعىندا كوروناۆيرۋستىق ينفەكسيا كارانتينىنە بايلانىستى بارلىق تۇرعىندار كەلەسى شەكتەۋ شارالارىن ساقتاۋى كەرەك:

• اسا قاجەتتىلىك بولماسا تۇرعىن ۇيدەن شىقپاڭىز.

• ادامدار كوپ جينالاتىن ورىندارعا - بانكتەرگە، ءدارىحانالارعا، دۇكەن مەن مەديتسينالىق مەكەمەلەرگە بارعاندا، قوعامدىق كولىككە مىنگەندە بەتپەردە كيىڭىز.

• تۇشكىرۋ نەمەسە جوتەلۋ كەزىندە مۇرىن مەن اۋىزدى ءبىر رەتتىك سۇلگىمەن جابىڭىز.

• قولدى سابىنمەن جۋىڭىز نەمەسە سپيرتتىك انتيسەپتيك جاعىڭىز.

• قوعامدىق ورىنداردا ەڭ كەمى 1,5-2 مەتر قاشىقتىقتى ساقتاڭىز.

• قول الماسىپ امانداسپاڭىز.

اۆتور: ايجان سەرىكجان قىزى