21:30, 26 - ناۋرىز 2020 | GMT +6
بالاعا قول جۋۋدى ۇيرەتۋدىڭ ءبىر ءادىسى
نۇر- سۇلتان. قازاقپارات - كوپتەگەن اۋرۋدىڭ الدىن الۋ ءۇشىن قولدى دۇرىس جۋۋ كەرەگى جايلى بارلىعى بىلەدى. ال قازىر كوروناۆيرۋسپەن كۇرەسۋ كەزىندە ول ماڭىزدى شارانىڭ ءبىرى بولىپ وتىر. ونىڭ ماڭىزىن ەرەسەكتەر بىلەدى، ال بالالارعا قالاي تۇسىندىرەمىز؟
فينليانديا تۇرعىنى اري مياكييو كىشكەنتاي قىزىنا قولدى نەلىكتەن سابىنمەن جۋۋ كەرەگىن ءتۇسىندىرۋدىڭ قاراپايىم ءادىسىن ويلاپ تاپقان. بۇل ماقساتتا ول ەكى ىدىستى الادى. بىرەۋىنە - قارا بۇرىش سەبىلگەن سۋ، ال ەكىنشىسىنە سۇيىق سابىن قۇيادى.
«قارا بۇرىش - ەكەۋمىز تالقىلاعان ۆيرۋس دەپ ەلەستەتەيىك. ساۋساعىڭدى سۋعا سال. ەندى شىعار. «ۆيرۋس» قولىڭا جابىسىپ قالعانىن كوردىڭ بە؟ ال ەندى ساۋساعىڭدى سابىنعا سالايىق. سودان سوڭ «ۆيرۋس» بار سۋعا قايتا سالايىق. بارلىق ۆيرۋستار قاشىپ كەتتى. مىنە، قولدى سابىنداپ جۋۋ ماڭىزدى» ، - دەپ تۇسىندىرەدى فين.
كىشكەنتاي بالاعا قولدى سابىنداپ جۋۋدىڭ ماڭىزدىلىعىن ءتۇسىندىرۋ ءۇشىن ءسىز دە وسى ءادىستى قولدانىپ كورىڭىز.
Massaget.kz