قاشىقتان وقىتۋ ءار مەكتەپتەگى ساباق كەستەسىنە سايكەس وتەدى
«ەلىمىزدە قاشىقتان وقىتۋ پروتسەسىن باستاۋعا دايىندىق جۇمىسى جۇرگىزىلۋدە. جۇمىس توبى قۇرىلدى. الەم ەلدەرىنىڭ قاشىقتان وقىتۋ تاجىريبەسى زەردەلەندى. مينيسترلىكتە قۇرىلعان جوبالىق كەڭسەنىڭ ۇسىنىستارىن ەسكەرە وتىرىپ، ءوز تۇجىرىمدامامىزدى ايقىندادىق. نەگىزگى كونتەنت رەتىندە تەليەۆيزيالىق ساباقتار، دايىن سيفرلىق رەسۋرستار ۇسىنىلادى» ، - دەدى مينيستر.
ونىڭ اتاپ وتۋىنشە، تەليەۆيدەنيەگە 2 مىڭنان استام ساباق تۇسىرىلەتىن بولادى. قازىرگى تاڭدا مۇنداي ساباقتاردىڭ 200 گە جۋىعى دايىن.
«ءبىر ايتىپ وتەتىن جاعداي، بۇل رەسۋرستاردىڭ بارلىعى پەداگوگقا جانە وقۋشىعا قوسىمشا اقپارات بولىپ سانالادى. نەگىزگى قاشىقتان وقىتۋ پروتسەسى ءار مەكتەپتەگى ساباق كەستەسىنە سايكەس وتەدى. ساباقتى وتكىزۋ ۋاقىتى 30 مينۋتتى قۇرايدى. وقۋشى، ءمۇعالىم، اتا- انا كەرى بايلانىستى «كۇندەلىك» ، «ءبىلىم ال» مەكتەپ جۇيەلەرى ارقىلى ورناتاتىن بولادى. بارلىق ادىستەمەلەر، نۇسقاۋلىقتار دايىن» ، - دەدى داۋرەن ابايەۆ.