الماتىدا كوروناۆيرۋسقا تەستتى قاي جەردە تاپسىرۋعا بولادى

الماتى. قازاقپارات – ق ر دەنساۋلىق ساقتاۋ مينيسترلىگى تاۋارلار مەن كورسەتىلەتىن قىزمەتتەردىڭ ساپاسىن جانە قاۋىپسىزدىگىن باقىلاۋ كوميتەتى الماتىدا كوروناۆيرۋسقا تەست تاپسىرۋ شارتتارىن اتادى، دەپ حابارلايدى قازاقپارات ءتىلشىسى.

كوميتەتتىڭ Telegram-كانالىندا تاراتىلعان اقپاراتقا سايكەس، كوروناۆيرۋستان تەستتى كەز كەلگەن ادام تاپسىرا المايدى. «تەستتى تەك دارىگەردىڭ باعىتتاۋىمەن عانا تاپسىرۋعا بولادى. كوپ ادامدار وزدەرىنىڭ كوڭىلىن ورنىنا ءتۇسىرۋ ءۇشىن COVID-19-عا تەست تاپسىرعىسى كەلەدى. رەسمي تۇردە تالداۋلار الماتىداعى 3 اككرەديتتەلگەن زەرتحانادا تاپسىرىلادى. تەستىلەۋدەن ءوتۋ ءۇشىن سالماقتى ارگۋمەنت قاجەت - ادامدا قانداي دا بەلگىلەر بولۋى ءتيىس. ال دەنە قىزۋى جوعارىلاپ، جوتەل باستالسا جەرگىلىكتى ەمحانادان دارىگەر شاقىرتۋ كەرەك. ەكسپرەسس- تەستىلەر ءوزىن شىنىمەن دە جايسىز سەزىنگەن ادامدارعا ارنالعان» ، - دەلىنگەن اقپاراتتا.