ازىق-تۇلىك دۇكەنىنە كەلگەندەرگە ماسكا تاعۋ مىندەتتەلەدى - سانيتارلىق دارىگەرلەر
بۇل تۋرالى ونلاين بريفينگ بارىسىندا قالالىق تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتى باسشىسىنىڭ ورىنباسارى ناتاليا دياگيليەۆا ايتتى، دەپ حابارلايدى قازاقپارات ءتىلشىسى.
«دۇكەندەرگە تەك ماسكامەن كىرۋگە بولادى. ەگەر كەلۋشىنىڭ ماسكاسى بولماسا، وعان قىزمەتكەرلەر بەرۋى كەرەك. ساۋدا ورىندارىندا وسىنىڭ ءبارىن قاداعالايتىن جاۋاپتى تۇلعا بولۋى ءتيىس. ساۋدا ورنىندا سانيتايزەرلەر قويىلۋى كەرەك. سانيتارلىق توراپتا سابىن جەتكىلىكتى بولۋى شارت»، - دەدى ول.
ال دۇكەندەردە قىزمەت كورسەتەتىن قىزمەتكەرلەر دە ماسكا تاعىپ، قولدارىنا ءبىر رەتتىك قولعاپ كيۋگە مىندەتتەلەدى. ناتاليا دياگيليەۆانىڭ ايتۋىنشا، ماسكا تاۋسىلعان جاعدايدا كاسىپكەرلەر ساتىپ الۋى ءتيىس.
«كەلۋشىلەر دە، ساتۋشىلار دا وسى تالاپتى ورىنداۋى ءتيىس. ولاي بولماعان جاعدايدا جازا قولدانىلادى»، - دەدى ول.
سونىمەن قاتار، ەرتەڭنەن باستاپ الماتىدا ۇلكەن-كىشىلىگىنە قاراماستان ازىق-تۇلىك ساتپايتىن بارلىق دۇكەندەر مەن ساۋدا ورىندارى جابىلاتىن بولادى.