10:30, 26 - ناۋرىز 2020 | GMT +6
ازيا دامۋ بانكى قازاقستانعا كورونوۆيرۋس ىندەتىمەن كۇرەسكە كومەك بەرمەك
نۇر-سۇلتان. قازاقپارات - بۇگىن ق ر ۇلتتىق ەكونوميكا ءمينيسترى رۋسلان دالەنوۆ كونفەرەنتس بايلانىس ارقىلى ازيا دامۋ بانكى پرەزيدەنتى اساكاۆا ماساتسۋگومەن كەلىسسوز جۇرگىزدى، دەپ حابارلايدى قازاقپارات ءتىلشىسى.
اتالعان ۆەدومستۆو باسپا ءسوز قىزمەتىنىڭ مالىمەتىنشە، ەلىمىزدىڭ ۇلتتىق بانك وكىلدەرى دە قاتىسقان كەلىسسوز بارىسىندا ازيا دامۋ بانكىنىڭ قازاقستانعا كورونوۆيرۋسپەن (COVID-19) كۇرەسكە وكپەنى جاساندى جەلدەتۋ اپپاراتىن، قورعانۋ ماسكالارىن جەتكىزۋ بويىنشا قايتارىمسىز تەحنيكالىق كومەك كورسەتۋ ماسەلەسى قاراستىرىلعان.
«قازىرگى ۋاقىتتا ازيا دامۋ بانكى جۇمىسپەن قامتۋ، باسىم سالالارداعى جۇمىس كۇشىن قايتا وقىتۋدى قولداۋ، سونداي-اق ەلىمىزدىڭ شيكىزاتقا تاۋەلدىلىگىن ازايتۋ جانە اۋىل شارۋاشىلىعى، اقپاراتتىق تەحنولوگيا مەن ەلەكتروندىق ساۋدا سالالارىن ىلگەرىلەتۋ ماقساتىندا ەكونوميكانى ءارتاراپتاندىرۋعا مۇمكىندىك بەرەتىن قولداۋ كورسەتۋدى كوزدەپ وتىر»، - دەدى مينيسترلىكتەن.