قازىر توي تويلايتىن، قىدىراتىن كەز ەمەس - داۋرەن ابايەۆ

نۇر-سۇلتان. قازاقپارات - ۇكىمەت كوروناۆيرۋسپەن كۇرەسۋ ءۇشىن بۇرىن-سوڭدى بولماعان اۋقىمدى شارالار اتقارۋدا.

بۇل تۋرالى «حابار 24» تەلەارناسىنىڭ تىكەلەي ەفيرىنەن ق ر اقپارات جانە قوعامدىق دامۋ ءمينيسترى داۋرەن ابايەۆ ايتتى، دەپ حابارلايدى قازاقپارات ءتىلشىسى.

«قۇرمەتتى وتانداستار! وزدەرىڭىز بىلەسىزدەر، ۇكىمەت كوروناۆيرۋسپەن كۇرەسۋ ءۇشىن بۇرىن-سوڭدى بولماعان اۋقىمدى شارالار اتقارۋدا. ادامدار دا ۇيىنەن شىقپاي ءومىر سۇرۋگە ۇيرەنىپ جاتىر. كوپشىلىگىمىز قاشىقتان جۇمىس ىستەۋگە كوشتىك. جاعداي كۇردەلى، سوندىقتان بارشاڭىزدىڭ كومەگىڭىز كەرەك»، - دەدى مينيستر.

ونىڭ اتاپ وتۋىنشە، ول ءۇشىن ماماندار ايتقان قاراپايىم كەڭەستەردى جاساۋ قاجەت.

«قولىڭىزدى ءجيى جۋىڭىز، ءار جۋعانىڭىز 20 سەكۋندتان كەم بولماسىن. ۇيدەن شىقپاڭىز. دالاعا شىقساڭىز، ماسكا كيىڭىز جانە ادامدارمەن 2 مەتر ارالىقتى ساقتاڭىز. كوپشىلىك بولىپ جينالماڭىزدار. قازىر توي تويلايتىن، قىدىراتىن ۋاقىت ەمەس. وسى قاراپايىم شارالاردى جاساۋ ارقىلى سىزدەر ءوزىڭىزدىڭ، جاقىندارىڭىزدىڭ ءومىرىن ساقتاي الاسىزدار»، - دەدى ول.

سونىمەن قاتار داۋرەن ابايەۆ بۇگىن ءبىلىم جانە عىلىم ءمينيسترى اسحات ايماعامبەتوۆ قازاقستاندىق اتا-انالارعا كارانتين ۋاقىتىندا بالالارىمىزعا كوبىرەك كوڭىل ءبولىپ، بىرگە كىتاپ وقۋعا، پايدالى ۆيدەولار كورۋگە شاقىرعانىن ەسكە سالدى.

«قاجەتتى ماتەريالداردىڭ ءتىزىمىن دە بەردى. بۇل كەرەمەت باستامانى قولداۋ كەرەك دەپ سانايمىن. ۇيدە بولايىق، امان بولايىق. ءبىز بىرگەمىز!»، - دەدى مينيستر.