الماتىلىقتار كەشكە بالكونعا شىعىپ دارىگەرلەرگە قوشەمەت كورسەتەدى

الماتى. قازاقپارات - الماتىدا ەسترادا جۇلدىزدارى، بلوگەرلەر كەشكى ساعات 20.00 دە بالكونعا شىعىپ دارىگەرلەر قۇرمەتىنە قول سوعۋعا شاقىردى، دەپ حابارلايدى قازاقپارات ءتىلشىسى.

وتاندىق شوۋ-بيزنەس وكىلدەرىنىڭ، شەنەۋنىكتەردىڭ بۇل اكتسياسى كوروناۆيرۋس ىندەتىمەن كۇرەسىپ جاتقان دارىگەرلەر، مەديتسينا ماماندارى، پوليتسيا قىزمەتكەرلەرى، اسكەريلەر، ۆولونتەرلەر، سانەپيدەميولوگتەر سياقتى مامانداردى قولداۋعا ارنالعان.

الەۋمەتتىك جەلىدە #almatybirgemiz حەشتەگىمەن تارالىپ جاتقان اقپاراتتا ادامدار كەشكى ساعات 20.00 دە بالكونعا شىعىپ 1 مينۋت قول سوعۋعا ۇسىنىس ءبىلدىرىپ جاتىر.

«وزدەرى قىزمەت بارىسىندا وسىنداي قۇرباندىققا بارعان جانداردى قولدايىق»، - دەدى اكىمدىكتىڭ باسپا ءسوز قىزمەتىنەن.