08:12, 26 - ناۋرىز 2020 | GMT +6
الماتى وبلىسىندا بايگە ۇيىمداستىرىلدى دەگەن اقپارات جالعان - اكىمدىك
تالدىقورعان. قازاقپارات - الماتى وبلىسىنىڭ الاكول اۋدانىندا ات جارىسى ۇيىمداستىرىلدى دەگەن اقپاراتتى اكىمدىك جوققا شىعاردى، دەپ حابارلايدى قازاقپارات ءتىلشىسى.
«الاكول اۋدانىنىڭ اكىمدىگى 25- ناۋرىز كۇنى ەڭبەكشى جانە جاناما اۋىلدىق وكرۋگتەرىنە قاراستى «كوكيىرىم» دەگەن جەردە اكىمدىك جانە حالىق تاراپىنان ەشقانداي ءىس-شارا ۇيىمداستىرىلماعانىن حابارلايدى.
اۋىلدىق وكرۋگ اكىمدەرى مەن ۋچاسكەلىك ينسپەكتورلار تەكسەرۋ جۇرگىزدى.
سونداي-اق، جىبەرىلگەن اۋديو-ۆيدەولار بۇرىن تۇسىرىلگەن جانە جىبەرىلگەن اقپاراتتار شىندىققا جاناسپايدى»، - دەلىنگەن الاكول اۋدانى اكىمىنىڭ باسپا ءسوز قىزمەتى تاراتقان حابارلامادا.
ايتا كەتەيىك، بۇعان دەيىن الەۋمەتتىك جانە WhatsApp جەلىسى ارقىلى الاكول اۋدانىندا بايگە ۇيىمداستىرىلدى دەگەن حابار تاراعان بولاتىن.
جەلى قولدانۋشىلارى ەلدەگى توتەنشە جاعداي كەزىندە مۇنداي شارانىڭ وتۋىنە قارسى نارازىلىعىن ءبىلدىردى.