جاپونيا قازاقستانعا كوروناۆيرۋستى انىقتاۋعا ارنالعان تەستىلەردى تەگىن بەرەدى

None
None
نۇر-سۇلتان. قازاقپارات - جاپونيا قازاقستانعا كوروناۆيرۋستى انىقتاۋعا ارنالعان تەستىلەردى تەگىن بەرەدى.

بۇل تۋرالى «حابار 24» تەلەارناسىنان ايتتى، دەپ حابارلايدى قازاقپارات ءتىلشىسى.

جاپونيانىڭ ينفەكتسيالىق اۋرۋلار بويىنشا ۇلتتىق ينستيتۋتى قازاقستاندىق زەرتحانالارعا كوروناۆيرۋستى انىقتاۋعا ارنالعان تەستىلەردى تەگىن تاپسىرادى.

قازاقستان ەلشىلىگىنىڭ وكىلدەرى كۇنشىعىس ەلىنىڭ دارىگەرلەرىمەن كەزدەسۋ وتكىزىپ، وسىنداي كەلىسىمگە كەلگەن. ەلىمىزگە جاپونيادا تۇراتىن وتانداستارىمىز دا كومەكتەسىپ جاتىر. وسى رەتتە «ماربي ترەيدينگ ينك» كومپانياسىنىڭ باس ديرەكتورى ابدىبەك قالىبەك قازاقستانعا 200 قورعانىس كوستيۋمى مەن 5 مىڭنان اسا مەديتسينالىق ماسكا بەرىپ جىبەردى.

«پارس اۋتو» كومپانياسىنىڭ مەنەدجەرى ەركەبۇلان اپسەمەت تە وتانىنا 4 مىڭنان استام بەتپەردە جونەلتكەن.

گۋمانيتارلىق جۇكتى «توكيو - نۇر-سۇلتان» تىكەلەي رەيسىمەن قازاقستاندىق اۋە كومپانيا تەگىن جەتكىزدى. سونىمەن قوسا، رەسپۋبليكامىزدىڭ جاپونياداعى ەلشىلىگىنىڭ وكىلدەرى بەينەكونفەرەنتسيا ۇيىمداستىرعان. وعان قازاقستاننىڭ دەنساۋلىق ساقتاۋ مينيسترلىگى مەن جاپونيانىڭ ينفەكتسيالىق اۋرۋلاردىڭ ۇلتتىق يسنستيتۋتىنىڭ قىزمەتكەرلەرى قاتىسقان.

تاراپتار كوروناۆيرۋستى ەمدەۋ ادىستەرىمەن الماسىپ، ونلاين كونسۋلتاتسيالاردى جالعاستىرۋعا كەلىستى.

«بۇگىندە جاپونيادا كوروناۆيرۋستى جۇقتىرعانداردىڭ سانى مىڭنان اسادى. ينفەكتسيانى شەتەلدەن الىپ كەلگەندەر كوپ. الداعى بىرنەشە اپتا جاپونيا ءۇشىن كۇردەلى كەزەڭ بولۋى مۇمكىن. ويتكەنى بۇل ۆيرۋستىڭ جاڭا ءتۇرى. سوندىقتان ونىمەن قالاي كۇرەسەتىنىمىزدى بىلمەيمىز. ءار ەل ءتيىستى شارالاردى قابىلداپ، زەرتتەۋلەر جۇرگىزىپ جاتىر. وسى رەتتە ءبىز ورتاق كونسۋلتاتسيالار وتكىزىپ وتىرۋىمىز كەرەك»، - دەدى جاپونيانىڭ اۋرۋلاردى باقىلاۋ جانە الدىن الۋ ورتالىعىنىڭ ديرەكتورى نوريو وماگاري.

سوڭعى جاڭالىقتار