ق ر پرەزيدەنتى: ەلدەگى ەپيدەميالىق جاعداي باقىلاۋدا

نۇر-سۇلتان. قازاقپارات - ءبارىمىز بىرگە جۇمىلا كۇرەسسەك كوروناۆيرۋستى جەڭەمىز. ق ر پرەزيدەنتى قاسىم-جومارت وسىلاي ءمالىم ەتتى، دەپ حابارلايدى قازاقپارات.

«كوروناۆيرۋسقا شالدىققان ەكى ازاماتىمىز ەمدەلىپ، ەرتەڭ اۋرۋحانادان شىعادى. جالپى، ەلدەگى ەپيدەميالىق جاعداي باقىلاۋدا. ءبارىمىز بىرگە جۇمىلا كۇرەسسەك، ىندەتتى جەڭەمىز. ەڭ باستىسى - ۋايىمداماي، دارىگەرلەردىڭ تالاپتارىن ورىنداۋ»، دەپ جازدى مەملەكەت باسشىسى Twitter- دەگى پاراقشاسىندا.

ق ر پرەزيدەنتى كوروناۆيرۋس ينفەكتسياسىمەن كۇرەسىپ جاتقان قىزمەتكەرلەرگە العىس ءبىلدىردى.

«حالىقتىڭ دەنساۋلىعى ءۇشىن ايانباي ەڭبەك ەتىپ جاتقان دارىگەرلەرگە، پوليتسيا قىزمەتكەرلەرى مەن اسكەري قىزمەتشىلەرگە ريزاشىلىعىمدى بىلدىرەمىن. #Birgemiz!»، - دەدى پرەزيدەنت.

ەسكە سالا كەتسەك، قازاقستاندا ەكى ەمدەلۋشى كوروناۆيرۋستان جازىلعان ەدى.