اسحات ايماعامبەتوۆ اتا-انالارعا حات جازدى
«قۇرمەتتى اتا-انالار! بالالارىمىزدىڭ كوكتەمگى كانيكۋلى 16- ناۋرىزدا باستالدى. قازىرگى كەزدە اتا-انالاردىڭ باسىم بولىگى ۇيدە جانە بالالارعا 21 كۇنگە سوزىلاتىن دەمالىستى قىزىقتى ءارى پايدالى وتكىزۋگە كومەكتەسە الادى. مەنىڭ ۇلىم - ءتورتىنشى سىنىپ وقۋشىسى. ءوزى كىتاپ وقىعاندى جاقسى كورەدى. مىسالى، وقۋ جىلى باستالعالى «روبينزون كرۋزو»، «توم سويەردىڭ باستان كەشكەن وقيعالارى»، «مەنىڭ اتىم قوجا»، «كوشپەندىلەر» تريلوگياسى كىتاپتارىن بىرگە وقىپ شىقتىق. سۇيىكتى كىتابىمىز - «كاپيتان گرانتتىڭ بالالارى». سونداي-اق ەجەلگى گرەك جانە مىسىر ميفتەرى مەن اڭىزدارىن قىزىعا وقىپ شىقتىق. اتا-انالاردىڭ بالالاردى كىتاپ وقۋعا باۋلىعانى وتە ماڭىزدى. ەگەر بالا ءسىزدىڭ كىتاپ وقىپ وتىرعانىڭىزدى ءجيى بايقايتىن بولسا، ءوزى دە قولىنا كىتاپ الاتىن بولادى»، - دەدى مينيستر حاتىندا.
ول بالا كەزىندە عىلىمي فانتاستيكا جانرىندا جازىلعان تۋىندىلاردى ۇناتقانىن، ايزەك ازيموۆ، رەي برەدبەري، اعايىندى سترۋگاتسكيلەر، كليففورد سايماك جانە روبەرت حاينلايننىڭ ەڭبەكتەرى قيالىن وياتقانىن اتاپ وتەدى.
«وسى اۆتورلاردىڭ تۋىندىلارىن وقىپ، كۇنى بويى حيكايالاردىڭ مازمۇنىن ويلاپ ءجۇرۋشى ەدىم. وسىلايشا، ەسەيە كەلە، عىلىمي ادەبيەتتەرگە دەگەن قىزىعۋشىلىعىم ارتتى. سوندىقتان، بالالاردى وسى جانرعا باۋلۋ وتە ماڭىزدى دەپ ويلايمىن. بالا كۇندە وقىعان سۇيىكتى تۋىندىلارىڭىزدى بالالارىڭىزعا ۇسىنىپ كورىڭىزدەر. ەڭ باستىسى، بالا ۇيدە كىتاپتى نەعۇرلىم كوپ وقيتىن بولسا، مەكتەپ باعدارلاماسىن سوعۇرلىم جەڭىل مەڭگەرەتىنىن ۇمىتپاڭىزدار»، - دەدى اسحات ايماعامبەتوۆ.
مينيستر ءوز حاتىندا كىتاپ وقۋدان بولەك، وتباسىمەن تانىمدىق ۆيدەولار قاراۋعا بولاتىنىن ايتادى.
«مىسالى، ۆيدەوساباقتاردى، ترەنينگتەر مەن عىلىمي تاجىريبەلەردى، TED- كونفەرەنتسيالارىن جانە باسقالاردى ءبىزدىڭ مينيسترلىكتىڭ سايتىنان ءبىلىم بەرۋ رەسۋرستارىنىڭ ءتىزىمىن تابا الاسىزدار. ايتپاقشى، قازىرگى كەزەڭدە ءبىلىم بەرۋگە باعىتتالعان سايتتاردى پايدالانۋ بارىسىندا ترافيك ەسەپتەلمەيدى، ياعني تەگىن بولادى. ول ءۇشىن ءبىز ينتەرنەت پروۆايدەرلەرىمەن كەلىسىم ورناتتىق. بۇل قوسىمشا ءبىلىم بەرۋ ورتالىقتارى، كۋرستار مەن سەكتسيالار جۇمىسىن توقتاتقان كەزەڭدە وتە ىڭعايلى بولماق. سونداي- اق، بۇل - بالالاردى ونلاين-فورماتتا ءبىلىم الۋعا يكەمدەۋگە جاقسى مۇمكىندىك، بولاشاقتا پايداسى تيەتىنى دە ءسوزسىز»، - دەدى ول.
ءبىلىم ءمينيسترى اتا-انالاردىڭ باسىم بولىگى كانيكۋل اياقتالعان سوڭ وقۋ پروتسەسى قالاي ۇيىمداستىرىلاتىنىن ۋايىمداپ جۇرگەنىن بىلەتىنىن اتاپ وتەدى.
«قازىرگى ۋاقىتتا وقۋدى قاشىقتان جۇرگىزۋگە كومەكتەسەتىن اقپاراتتىق جۇيەلەردى دايىنداپ، تەستىلەۋدەمىز. كەيبىر ساباقتاردى تەلەارنالار ارقىلى وتكىزۋگە بولادى. بۇل فورمات ءبىزدىڭ وقۋشىلار مەن ۇستازدار ءۇشىن ۇيرەنشىكتى ەمەس، سوندىقتان پەداگوگتەردىڭ جۇمىسىنا تۇسىنىستىكپەن جانە قۇرمەتپەن قاراۋلارىڭىزدى سۇرايمىن. ولار وقۋشىلارىن ساعىندى جانە مەكتەپكە كەلەر ءساتىن اسىعا كۇتۋدە. بۇل - ءمينيستردىڭ ەمەس، جاعدايعا بايلانىستى بالالارىمىزدا كەنەتتەن پايدا بولعان بوس ۋاقىتتى ءتيىمدى وتكىزۋدى جانە وسى كەزەڭ ءبىزدى بالالارىمىزبەن جاقىنداستىرا ءتۇسۋدى قالايتىن اكەنىڭ ۇسىنىستارى عانا. بالاپاندارىمىزدىڭ باقىتتى بولۋى ءبىز بەن سىزگە تىكەلەي بايلانىستى. ءوزىڭىز بەن جاقىندارىڭىز امان بولعاي!»، - دەدى اسحات ايماعامبەتوۆ.