كارانتيندەگى الماتى: قالا قالاي وزگەردى؟
قازاقپارات فوتوتىلشىسى ەكى كۇندە قالا كوشەلەرىندەگى كورىنىستى ءتۇسىرىپ الدى.
توتەنشە جاعداي رەجىمىنە بايلانىستى ەلدىڭ ەكى ءىرى قالاسى الماتى مەن نۇر-سۇلتاندا كارانتينگە بايلانىستى ىرگەسىن بەكىتكەن بولاتىن.
قالادا بارلىق قوعامدىق ورىندار ساۋدا، ويىن ساۋىق ورتالىقتارى، ساياباقتار، قىزمەت كورسەتۋ ورىندارى جابىلدى. تەك ازىق-تۇلىك ساتاتىن دۇكەندەر مەن ءدارىحانالار عانا جۇمىسىن توقتاتپادى.
وقۋشىلار تۇگەل دەمالىسقا جىبەرىلدى، بالاباقشالار جابىق. بارلىق كاسىپورىندار جۇمىسشىلارىن قاشىقتان جۇمىسقا اۋىستىرىپ جاتىر.
الماتى كوشەلەرىندەگى ادەتتە، اسىرەسە مەرەكە كۇندەرى قايناپ جاتاتىن تىرشىلىك توقتاپ قالعان.
كوشەلەر بوس، كەپتەلىس جوق. دالاداعى ادامداردىڭ بارلىعى دەرلىك بەتپەردە تاققان، اسىعىس، ەشكىمنىڭ ەشكىممەن ءىسى جوق. ادەتتە اۋزى-مۇرنىنا سىيماي جۇرەتىن قوعامدىق كولىكتەردە ادام بىرەن-ساران.
مەشىتتەر مەن شىركەۋلەر دە جابىق. ءتىپتى جەكەمەنشىك ادام تاسىمالداۋمەن اينالىساتىن تاكسيلەر دە تاپسىرىس بەرەتىن ادامداردىڭ ازايىپ كەتكەنىن ايتىپ شاعىمدانىپ جاتىر.
باستاپقىدا ادامعا ۇرەي ۇيالاتاتىن بۇل احۋال امالسىزدان تۋىنداپ وتىر. قالا بيلىگى ادامداردى تولىق وقشاۋلاپ ينفەكتسيا تىزبەگىن ءۇزۋدى كوزدەپ وتىر.
الايدا ماماندىعىنا بايلانىستى قالانىڭ تىنىس تىرشىلىگىنەن قول ۇزە المايتىن كاسىپ يەلەرى ءالى دە جۇمىسىن جالعاستىرىپ جاتىر.
اسىرەسە، دارىگەرلەر، كوممۋنالدى قىزمەت وكىلدەرى، ازىق-تۇلىك جەتكىزۋشىلەردىڭ اتقارىپ وتىرعان جۇمىسى اتان تۇيەگە جۇك بولارلىق. ال كۇنىنە 250 مىڭ ماشينا كىرىپ-شىعاتىن الماتىنىڭ اۋا باسسەينى شىنىمەن تازارعانى بايقالادى.
وعان كوكتوبەدەن تۇسىرىلگەن سۋرەتتەر كۋا. قازىر قالانىڭ شەتكى شەكارالارى مەن كوكجيەگى انىق كورىنەدى.
