قازاقستاندا كوروناۆيرۋس شىرقاۋ شەگىنە جەتىپ، قاشان تومەندەيدى - ءبىرتانوۆ جاۋاپ بەردى

نۇر-سۇلتان. قازاقپارات - ءساۋىر ايىنىڭ ورتاسىنا قاراي كوروناۆيرۋس ينفەكسياسىن جۇقتىرۋ دەرەكتەرى تومەندەي باستاۋى ءتيىس.

بۇل تۋرالى ق ر دەنساۋلىق ساقتاۋ ءمينيسترى ەلجان ءبىرتانوۆ ايتتى، دەپ حابارلايدى قازاقپارات ءتىلشىسى.

«توتەنشە جاعداي رەجىمىن ۇزارتۋ ەپيدەميولوگيالىق جاعدايعا، كوروناۆيرۋس ينفەكسياسىن جۇقتىرۋ جاعدايىنا بايلانىستى بولادى. ءبىز 15-ساۋىرگە قاراي ۆيرۋسقا شالدىعۋ تومەندەي باستايدى دەپ ۇمىتتەنەمىز. مۇنداي جاعدايدا شەشىمدى مەملەكەت باسشىسى قابىلدايتىن بولادى. ءبىز مەملەكەتتىك كوميسسيادا كۇن سايىن بۇل احۋالدى قاراستىرىپ وتىرامىز. دەگەنمەن، جاعداي تەرىس ءوربيتىن بولسا، وندا توتەنشە جاعداي رەجىمىنىڭ ۇزارتىلاتىندىعى ءسوزسىز»، - دەدى مينيستر ۆەدومستۆونىڭ Facebook-تەگى پاراقشاسىندا «دەنساۋلىق مينيسترلىگى حابارلايدى...» دەگەن ايدارمەن جاريالانعان ۆيدەودا.

ونىڭ اتاپ وتۋىنشە، بولجامعا سايكەس، ءساۋىر ايىنىڭ العاشقى ون كۇنىندە كوروناۆيرۋسقا شالدىعۋ دەرەگى شىرقاۋ شەگىنە جەتۋى مۇمكىن.

«دەگەنمەن، قابىلدانعان كارانتيندىك شارالار ءبىزدىڭ ەسەپتەۋىمىزشە اۋرۋدىڭ تارالۋىن شامامەن 50 پايىزعا تومەندەتىپ وتىر. سوندىقتان كارانتيندىك شارالاردى ساقتاۋ بارىنشا ماڭىزدى جانە ول مۇنان ارى دا قاتاڭداتىلۋى مۇمكىن. ونى كەشە پرەزيدەنتىمىز دە ايتقان بولاتىن. بۇل ينفەكسيانىڭ تارالۋ جىلدامدىعىن ايتارلىقتاي تومەندەتۋگە ىقپال ەتەدى»، - دەدى ەلجان ءبىرتانوۆ.