قىتايدا ءبىر ءدارىنىڭ كوروناۆيرۋسقا قارسى اسەرى ءتيىمدى ەكەنى ايتىلدى - شەتەلدەگى قازاق ءتىلدى ب ا ق- قا شولۋ
يراندا رەسمي ۋاقىت ءبىر ساعاتقا العا جىلجىتىلدى - «فارس» اقپارات اگەنتتىگى
«وسى اپتانىڭ سەنبى كۇنى يراندا ۋاقىت ءبىر ساعاتقا العا جىلجىتىلدى» دەپ حابارلايدى Рarstoday . اتالعان ب ا ق- تىڭ دەرەگىنە سۇيەنسەك، يراننىڭ يسلام كەڭەسى ءماجىلىسى بەكىتكەن «يراننىڭ رەسمي ساعاتىن وزگەرتۋ» زاڭىنا سايكەس جىل سايىن 21-ناۋرىزدا ەلدىڭ رەسمي ۋاقىتى ءبىر ساعاتقا العا جىلجىتىلادى. بۇل زاڭ كوكتەم مەن جازعى ايلاردا كۇننىڭ جارىعىن كوبىرەك پايدالانىپ، ەلەكتر قۋاتىن ۇنەمدەۋ ماقساتىمەن قابىلدانعان بولاتىن. حيدجري- شامسي كۇنتىزبەسى بويىنشا جازدىڭ سوڭعى كۇنى – 21-قىركۇيەكتە ساعات بۇرىنعى قالپىنا ورالادى.
ۇيدە نان ءپىسىرۋ ەرەكشە كوڭىل-كۇي مەن قۋانىش اكەلۋدە - «فارس» اقپارات اگەنتتىگى
كوروناۆيرۋستىڭ تارالۋى مەن وعان بايلانىستى گيگيەنالىق ماسەلەلەر كەيبىر وتباسىلاردىڭ ناندى ۇيلەرىندە پىسىرۋىنە سەبەپ بولدى، دەپ حابارلايدى «Рarstoday «اقپارات اگەنتتىگى.
يراندىق اقپارات كوزىنىڭ دەرەگىنشە، ناندى ۇيدە پىسىرۋگە وتباسىنىڭ بارلىق مۇشەلەرى قاتىساتىندىقتان بۇل جۇمىس ادامدارعا ەرەكشە كوڭىل- كۇي مەن قۋانىش اكەلەدى ەكەن.
ايتا كەتەرلىگى، يراننىڭ دەنساۋلىق ساقتاۋ مينيسترلىگى 17 -ناۋرىزعا دەيىن ەلدە ۆيرۋس جۇقتىرعان 5389 ادام ساۋىعىپ، اۋرۋحانادان شىعارىلعانىن مالىمدەدى. يران دەنساۋلىق ساقتاۋ مينيسترلىگىنىڭ باسپا ءسوز وكىلى كيانۋش جاھانپۋر سەيسەنبى كۇنى تىلشىلەرگە بەرگەن سۇحباتىندا، ەلدە 16169 ادامنىڭ كوروناۆيرۋسقا شالدىققانىن ايتىپ، وكىنىشكە قاراي، وسى كۇنگە دەيىن 988 ادام ۆيرۋس سالدارىنان كوز جۇمعانىن ايتقان.
قازاق ەلشىسى موڭعولياداعى قانداستاردى ناۋرىز مەرەكەسىمەن قۇتتىقتادى - Kaznews
قازاقستاننىڭ موڭعولياداعى توتەنشە جانە وكىلەتتى ەلشىسى جالعاس ادىلبايەۆ قانداستاردى ناۋرىز مەرەكەسىمەن قۇتتىقتادى، دەپ حابارلايدى موڭعوليالىق Kaznews اقپارتتىق پورتالى.
«ناۋرىز - كۇن مەن ءتۇننىڭ تەڭەلەتىن، جەر ارقاسى كەڭىپ، كۇللى تىرشىلىك الەمى قايتا تۇلەيتىن تابيعات مەيرامى. ۇلىستىڭ ۇلى كۇنى - «قىزىر ءتۇنىن» كۇتىپ، جاقسىلىق قۇت- بەرەكە تىلەپ، ەرتەڭگى كۇنگە زور ۇمىتپەن قارايتىن سەنىم مەرەكەسى. نۇر كوكتەممەن قاتار كەلگەن ۇلىق مەرەكەدە ءار شاڭىراققا جاقسىلىق، وسكەلەڭ ۇرپاققا اماندىق تىلەي وتىرا قانداستارىمىزدىڭ بىرلىگى ماڭگى، ىنتىماقتاستىعىمىز جەمىستى بولسىن دەگىمىز كەلەدى. بارشاڭىزدى كوكتەمنىڭ شۋاقتى دا شىرايلى مەرەكەسىمەن قۇتتىقتاي وتىرىپ، ناۋرىز مەيرامى جاقسى ىستەر مەن يگى باستامالاردىڭ باستاۋى بولۋىنا تىلەكتەسپىن! ۇلىس باقتى بولسىن، ءتورت تۇلىك اقتى بولسىن، قۇرمەتتى قانداستار!» دەپ قۇتتىقتادى دەپ جازادى موڭعوليالىق ب ا ق.
قىتايدا ءبىر ءدارىنىڭ كوروناۆيرۋسقا قارسى پايداسى ايتىلدى - TRT
قىتايداعى كلينيكالىق سىناقتار «Favipiravir» اتتى ءبىر ءدارىنىڭ كوروناۆيرۋستىڭ جاڭا تۇرىنە قارسى ەمدەۋدە ىقپالدى ەكەنىن كورسەتتى، دەپ حابارلايدى تۇركيا راديو تەلەۆيزيا پورتالى.
اتالعان ب ا ق-تىڭ مالىمەتىنە سۇيەنسەك، قىتايدىڭ CGTN ارناسىنىڭ حابارىنا قاراعاندا، قىتاي ۇلتتىق بيوتەحنولوگيا زەرتتەۋ ورتالىعىنىڭ ءتوراعاسى گانگ باسپا ءسوز بريفينگىندە، شەنزەن قالاسىندا كوروناۆيرۋس جۇعىپ اۋىرعان 80 كىسىگە كلينيكالىق سىناق جۇرگىزىلگەنىن مالىمدەگەن. گانگ سىناقتا «Favipiravir» اتتى ءدارىنىڭ جەڭىل ناۋقاستار ءۇشىن ساۋىعىپ كەتۋ مەرزىمىن 11 كۇننەن 4 كۇنگە ازايتقانىن ايتقان. ول ۋحان قالاسىندا جۇرگىزىلگەن باسقا ءبىر كلينيكالىق سىناقتا ءدارىنىڭ جوعارى تەمپەراتۋرانى 4,2 كۇننەن 2,5 كۇنگە ازايتقانىن انىقتاعاندارىن، گانگ ءدارىنىڭ ماڭىزدى جاناما اسەرى بايقالماعانىن دا قوسا ايتتى.
گانگتىڭ ايتۋىنشا، Favipiravir ءدارىسى 2014 -جىلدان بەرى جاپونيا نارىعىندا بار ەكەن. Avigan نەمەسە Favilavir دەپ تە اتالاتىن ءدارى ناۋقاستارعا قولدانىلدى. الايدا جاڭا تيپتەگى كوروناۆيرۋس ەپيدەمياسى بۇكىل الەمگە اسەر ەتۋدە. ەم ءۇشىن ءدارى جەتىلدىرۋ جۇمىستارى دا بار قارقىنىمەن جالعاسۋدا.
«دۇنيەجۇزىلىك دەنساۋلىق ساقتاۋ ۇيىمىنان كوروناۆيرۋستان ەمدەۋ تاقىرىبىندا ءبىر ەسكەرتۋ كەلدى. اۋرۋدىڭ بەلگىلەرى بار ادامداردىڭ دارىگەرمەن كەڭەسپەي ibuprofen ىشپەۋى كەرەكتىگى ايتىلدى. ونىڭ ورنىنا اۋىرعانعا جانە جوعارى تەمپەراتۋراعا پاراتسەتامول تۇرىندەگى ءدارىنى ءىشۋ كەڭەسى بەرىلدى» دەپ جازادى تۇركيا راديو تەلەۆيزيا پورتالى.
ibuprofen مەن ءبىر توپتاعى دارىلەر كوروناۆيرۋسپەن كۇرەستە اۋرۋدى اسقىندىرىپ جىبەرەدى دەپ ايتىلدى. ۆيرۋستان ەمدەۋدە ءالى راستالعان ناقتى ۆاكتسينا نەمەسە ءدارى جوق.
بەكبولات بۇعىباي ۇلى بايان-ولگەيدە ۋنيۆەرسيتەت فيليالىن اشۋعا ينۆەستيتسيا تارتتى - Kaznews
بەكبولات بۇعىباي ۇلى 2013-2016 وقۋ جىلدارى قوبدا ۋنيۆەرسيتەتىنىڭ بايان-ولگي ايماعىنداعى فيليالىن باسقارعان. ول سول ۋاقىتتا شۆەيتساريالىق انيتا فارنيمەن بىرلەسىپ، ايماقتاعى فيليالعا جاتاقحانا سالۋعا باستاما كوتەرگەن. حالىقارالىق ىنتىماقتاستىقتاعى جوعارى دارەجەدەگى بەلسەندىلىگى ارقىلى قازىرگى ۋاقىتتا Give2Asia حالىقارالىق ۇيىمىنان جيىنتىعى 130000 ا ق ش دوللارىن قۇرايتىن ينۆەستيتسيا تارتقان. بۇل تۋرالى وسى اپتادا Kaznews اقپارتتىق پورتالىندا حابارلاندى.
اتالعان ب ا ق بەكبولات بۇعىباي ۇلىنان وسى تۋرالى العان ەكسكليۋزيۆتى سۇحباتىن جاريالاعان بولاتىن. بەكبولات بۇعىباي ۇلى سۇحباتىندا 2015 -جىلى ايماق اكىمى قىزمەتىن اتقارعان ق. دارمەن ارقىلى موڭعوليانىڭ سىرتقى ىستەر مينيسترلىگىنەن Give2Asia حالىقارالىق ۇيىمىمەن ىنتىماقتاستىق تۋرالى كەلىسىم شارت جاساۋعا رەسمي رۇقسات الىپ، قاراجات بولگىزۋ جۇمىسىن باستاعانىن ايتادى.
«مىنە بۇگىن يگى ءىستىڭ ناتيجەسىنە قول جەتكىزگەنىمىزگە قۋانىشتىمىز. اتالمىش حالىقارالىق ۇيىم ارقىلى شەتەلدەن جالپى 130000 ا ق ش دوللارىنا ينۆەستيتسيا تارتىلىپ، ونىڭ $93,000 ى فيليالدىڭ ەسەپ شوتىنا كەلىپ ءتۇستى. قالعانى الداعى ۋاقىتتا تۇسەتىن بولادى. بۇل ۋنيۆەرسيتەتتىڭ ايماعىمىزداعى فيليالى ءۇشىن ءبىر قۋانىشتى جاعداي بولدى. الداعى ۋاقىتتا دا ايماعىمىزدىڭ جالعىز جوعارعى وقۋ ورنىنىڭ وركەندەپ دامۋىنا قولىمنان كەلگەنشە كومەك جاساۋعا دايىنمىن» ، - دەيدى بەكبولات بۇعىباي ۇلى.
قىتاي ەندى قاۋىپتى ىندەتتى شەتەلدەن الىپ كەلۋشىلەرمەن كۇرەسۋدە - قىتايدىڭ «ورتالىق حالىق راديوسى» (CNR)
«19-ناۋرىزعا دەيىن شەتەلدەن قىتايعا كەلگەندەر اراسىنان Covid-19 كوروناۆيرۋسىن جۇقتىرىپ كەلگەن ازاماتتار سانى 228 ادامعا جەتكەن. ەندى قىراعىلىقتى ارتتىرۋ كەرەك» دەپ تۇيىندەيدى قىتايدىڭ «ورتالىق حالىق راديوسى».
اۆتور: بەيسەن سۇلتان