الماتىدا ساياباقتاردىڭ بارلىعى ۋاقىتشا جابىلدى
«كوروناۆيرۋستىڭ بۇدان ءارى تارالۋىنىڭ الدىن الۋ ماقساتىندا 2020-جىلدىڭ 21- ناۋرىزىنان باستاپ الماتى قالاسىنداعى بارلىق ۇلتتىق ساياباقتار ۋاقىتشا جابىلادى. الماتىلىقتاردان كارانتين كەزىندە تۇڭعىش پرەزيدەنت ساياباعىنا، ورتالىق مادەنيەت جانە دەمالىس ساياباعىنا، 28 پانفيلوۆشى پاركىنە، Family Park-كە، بوتانيكالىق باققا، «قيال الەمى» ساياباعىنا، الماتى زووباعىنا، الما-اراسان جانە وزگە دە ادام كوپ جينالاتىن ورىندارعا بارۋدان باس تارتۋدى سۇرايمىز»، - دەلىنگەن رەسمي مالىمدەمەدە.
ەسكە سالا كەتسەك، بۇدان بۇرىن قالا اكىمدىگىنىڭ شەشىمىمەن مەدەۋ، شىمبۇلاق، پيونەر، كوكتوبە، سونداي-اق ىشكى تۋريزم بويىنشا ەكسكۋرسيالاردى جۇزەگە اسىراتىن تۋريستىك ۇيىمداردىڭ قىزمەتى ەپيدەميولوگيالىق احۋال تۇراقتانعانعا دەيىن ۋاقىتشا توقتاتىلعان بولاتىن.
سونداي- اق، تۋريزم باسقارماسى كوروناۆيرۋس تىركەلگەن ءقاۋىپتى كاتەگوريالى ەلدەرگە قاتىنايتىن جانە سول ەلدەردەن بىزگە كەلەتىن تۋرلاردى ۋاقىتشا توقتاتۋعا ۇسىنىس بىلدىرگەن بولاتىن.
COVID-19 بۇدان ءارى تارالۋىنىڭ الدىن الۋ ماقساتىندا ادام كوپ جينالاتىن ورىندارداعى ساقتىق شارالارىن قاتاڭ قاداعالاۋ تۋرالى نۇسقاۋلىقتار تاراتىلدى.
ەسكە سالايىق، الماتىدا كوروناۆيرۋس انىقتالعان 10 وشاق تىركەلىپ، تۇرعىن ۇيلەر كارانتينگە الىندى.