بۇگىن - جىل باسى ناۋرىز مەيرامى

None
None
نۇر-سۇلتان. قازاقپارات - بۇگىن ۇلىستىڭ ۇلى كۇنى - ناۋرىز مەيرامى باستالدى، دەپ حابارلايدى قازاقپارات ءتىلشىسى.

ناۋرىز - كوكتەم مەيرامى جانە ورتالىق ازيا حالىقتارىنىڭ جاڭا جىلى. ول بىرنەشە مىڭ جىلدان بەرى اتالىپ كەلەدى. كونە پارسى تىلىندە «ناۋرىز» جاڭا ايدىڭ ءبىرىنشى كۇنى دەگەندى بىلدىرەدى.

بۇل ايدى سوعدالىقتار «ناۋسارىز»، حورەزمدىكتەر «ناۋساردجي»، ارمياندار «ناۆاساردي»، چۋۆاشتار «نوراس-وياحە» دەپ اتاعان.

2001-جىلى ناۋرىز مەيرامى مەملەكەتتىك مەرەكە رەتىندە جاريالاندى. ال 2010-جىلدان بەرى ءۇش كۇن - 21-23 -ناۋرىز ارالىعىندا تويلانىپ كەلەدى. بيىل 21، 22- ناۋرىز سەنبى، جەكسەنبىگە سايكەس كەلىپ تۇرعاندىقتان، 24، 25- ناۋرىز كۇندەرى دە دەمالىس بولىپ سانالادى.

مەيرام كۇندەرى ناۋرىز كوجە دايىندالادى، قىسقى سوعىمنىڭ ابدەن سۇرلەنگەن قادىرلى مۇشەلەرى وسى كۇنى اسىلادى. سوعىمعا سويىلعان مالدىڭ باسى نەمەسە شەكەسى قوسىلىپ، قازى-قارتا، جال-جايا قازانعا تۇسەدى. ەت سورپاسىنا كوجە قايناتادى. سونداي-اق بۇل كۇنى كوڭىلىندە كىربىڭى بارلار تاتۋلاسادى، بۇلاق كوزىن اشادى، الدىن الا ءۇيىن، اۋلاسىن كىر-قوقىستان تازارتادى.

بۇل مەرەكەنى «جىل باسى» دەپ تانىعانىمەن، ونىڭ بارشا بولمىسىن، فيلوسوفياسىن جىل الماسۋمەن شەكتەمەيدى. وسى كۇندەرى دۇنيەگە كەلگەن سابيلەرگە ناۋرىزباي، ناۋرىزگۇل سىندى ەسىمدەر بەرىلەدى.

جەر يەسى - قىدىر اتا ەلدى، ءۇيدى ارالاپ، باقىت سىيلايدى، باتا بەرەدى دەگەن سەنىم-نانىم جانە بار.

ۇلىستىڭ ۇلى كۇنىندە «قازاقپارات» ح ا ا ۇجىمى بارشا قازاقستاندىقتارعا قۇت-بەرەكە تىلەيدى. جاڭارۋ مەن جاسامپازدىقتىڭ باستاۋى، ىرىس پەن بەرەكەنىڭ ارقاۋى بولعان ءاز ناۋرىز قاجىرلى ەڭبەكتەرىڭىزگە تولاعاي تابىس اكەلسىن.

ەل امان بولىپ، ارايلاپ اتقان ءاربىر تاڭ شات كوڭىل، باقىت جانە بەرەكە سىيلاسىن. اق مول، جىل ىرىستى بولسىن!

ايتا كەتەيىك، كوروناۆيرۋس ىندەتىنىڭ تارالۋىنا قارسى ەلىمىزدە قولعا الىنعان شارالارعا بايلانىستى مەرەكەنى وتباسىندا اتاپ ءوتۋ ۇسىنىلادى.


سوڭعى جاڭالىقتار